އީރާނުން އެމެރިކާގެ ދެ ޖެޓް ވައްޓާލައިފި؛ ފިލައިގެން އުޅުނު އެއް ޕައިލެޓް ސަލާމަތްކޮށްފި

އީރާނާއި އެމެރިކާއާ ދެމެދު ކުރިއަށްދާ ވަރުގަދަ ހަނގުރާމައިގެ ތެރެއިން، އީރާނުގެ ވައިގެ ސަރަހައްދަށް ވަތް އެމެރިކާގެ ދެ ޖެޓެއް އީރާނުން ވައްޓާލައިފި އެވެ. މި ހާދިސާގައި ވައްޓާލި އެފް-15 މަރުކާގެ ޖެޓުން ސަލާމަތްވި ދެ ޕައިލެޓުންގެ ތެރެއިން އެކަކު، އެމެރިކާގެ ސްޕެޝަލް ފޯސަސްއިން ހިންގި ނުރައްކާތެރި އޮޕަރޭޝަނެއްގައި ސަލާމަތްކޮށްފައިވާ ކަމަށް މީޑިއާ ރިޕޯޓްތައް ބުނެފި އެވެ.

އީރާނުގެ އިންގިލާބީ ލަޝްކަރު (އައިއާރްޖީސީ) އިން ބުނި ގޮތުގައި، އެ ގައުމުގެ އެޑްވާންސް އެއާ ޑިފެންސް ސިސްޓަމް ބޭނުންކޮށްގެން އެމެރިކާގެ އެފް-15 ޖެޓް ވައްޓާލާފައިވަނީ އީރާނުގެ މަރުކަޒީ ވައިގެ ސަރަހައްދުންނެވެ. މި ޖެޓް ވައްޓާލި ވަގުތު، ގަލްފު ސަރަހައްދަށް އެމެރިކާގެ އޭ-10 މަރުކާގެ އެހެން ބޯޓެއް ވެސް ވައްޓާލާފައިވާ ކަމަށް އީރާނުގެ އަސްކަރިއްޔާއިން މައުލޫމާތުދެ އެވެ.

އެމެރިކާގެ މީޑިއާތަކުން ރިޕޯޓްކޮށްފައިވާ ގޮތުގައި، އެފް-15 ޖެޓުން ފުންމާލި ޕައިލެޓުންގެ ތެރެއިން އެކަކު ސަލާމަތްކުރުމަށް ހިންގި އޮޕަރޭޝަނުގައި އެމެރިކާގެ ރެސްކިއު ހެލިކޮޕްޓަރަކަށް އީރާނުން ހަމަލާދީ ގެއްލުންތަކެއް ދީފައިވެ އެވެ. ނަމަވެސް، އެ ހެލިކޮޕްޓަރު ވަނީ ޕައިލެޓާ އެކު ސަލާމަތުން އެނބުރި ގޮސްފަ އެވެ. ދެވަނަ ބޯޓުގެ ޕައިލެޓް ވެސް ސަލާމަތްކުރެވިފައިވާ ކަމަށް ބައެއް މަސްދަރުތަކުން ބުނެ އެވެ.

މި ހާދިސާއާ ގުޅިގެން އީރާނުން ވަނީ، ފިލައިގެން އުޅޭ އެމެރިކާގެ ޕައިލެޓް ދިރިހުއްޓާ ހޯދައި އަތުލައިގަންނަ ކޮންމެ މީހަކަށް ”އަގުހުރި ބޮޑު އިނާމެއް“ ދޭނެ ކަމަށް އިއުލާންކޮށްފަ އެވެ.

އެމެރިކާގެ ސެންޓްރަލް ކޮމާންޑުން މިކަމާ މެދު އަދި ރަސްމީކޮށް އެއްޗެއް ބުނެފައި ނުވާއިރު، ވައިޓް ހައުސްގެ ޕްރެސް ސެކްރެޓަރީ ކެރޮލީން ލީވިޓް ވިދާޅުވީ މި ހާދިސާގެ ފުރިހަމަ މައުލޫމާތު ރައީސަށް އަރުވާފައިވާ ކަމަށެވެ. މިކަމާ ގުޅޭގޮތުން ރައީސް ޑޮނަލްޑް ޓްރަމްޕް އެންބީސީ އަށް ވިދާޅުވީ، ޖެޓް ވައްޓާލުމަކުން އީރާނާއެކު ކުރާ މަޝްވަރާތަކަށް އަސަރެއް ނުކުރާނެ ކަމަށެވެ. ”ނޫން، އެއްވެސް އަސަރެއް ނުކުރާނެ. މިއީ ހަނގުރާމައެއް،“ ޓްރަމްޕް ވިދާޅުވި އެވެ.

ފެބްރުއަރީ 28 ގައި އިޒްރޭލާއި އެމެރިކާއިން އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން ފެށުނު މި ހަނގުރާމައިގައި އެމެރިކާގެ އަސްކަރިއްޔާއަށް ދަނީ ބޮޑެތި ގެއްލުންތަކެއް ވަމުންނެވެ. މީގެ ކުރިން ވެސް އިރާގަށް ޓޭންކަރެއް ވެއްޓިފައިވާއިރު، އޮޅުމަކުން ދެވުނު ހަމަލާތަކެއްގައި އެމެރިކާގެ އިތުރު ތިން ޖެޓެއް ވެސް ވަނީ ގެއްލިފަ އެވެ.

މި ނުރައްކާތެރި ހާލަތާ ގުޅޭގޮތުން އެމެރިކާގެ ރިޓަޔާޑް ބްރިގޭޑިއާ ޖެނެރަލް ހިއުސްޓަން ކާންޓްވެލް ވިދާޅުވީ، ބޯޓު ވެއްޓޭ ހާލަތްތަކުގައި ޕައިލެޓުންގެ އެންމެ އިސް އަމާޒަކީ ދުޝްމަނުންގެ އަތްދަށުނުވެ ފިލައިގެން އުޅުން ކަމަށެވެ. މި ހަނގުރާމައިގެ ސަބަބުން މުޅި ސަރަހައްދުގެ މަސްލަހަތު ގެއްލި، ދުނިޔޭގެ އިގްތިސާދަށް ވެސް ދަނީ ބޮޑެތި ލޮޅުންތަކެއް އަރަމުންނެވެ.