ބާރު ސްޕީޑުގައި ދުއްވާފައި ދިޔަ ސައިކަލަކުން ޑިއުޓީގައި ހުރި ފުލުހެއްގެ ގައިގައި ޖައްސައި، ބޮޑެތި އަނިޔާތަކެއް ދިން މައްސަލައިގައި ހައްޔަރުކުރި ހަތަރު މީހުން ވެސް މަސްތުވާތަކެއްޗަށް ޕޮޒިޓިވްވެފައިވާ ކަމަށް ފުލުހުންނާއި ކޯޓުގެ ލިޔެކިޔުންތަކުން ހާމަވެއްޖެއެވެ.
މި ހާދިސާ ހިނގާފައިވަނީ ހުކުރު ދުވަހުގެ ފަތިހު 04:29 ހާއިރު، ސިނަމާލެ ބްރިޖު ހައިވޭއިން މާލެއިން ހުޅުމާލެއަށް ދަތުރުކުރާ ލޭނުގައެވެ. އަނިޔާވި ފުލުސް އޮފިސަރަކީ ނުރައްކާތެރިކޮށް އުޅަނދު ދުއްވުން ހުއްޓުވުމަށާއި މަގުމަތީގެ ސަލާމަތް ކަށަވަރު ކުރުމަށްޓަކައި އެ ސަރަޙައްދުގައި ޤާއިމުކޮށްފައިވާ ވެހިކަލް ޗެކްޕޮއިންޓް (ވީސީޕީ) ގައި ޑިއުޓީ އަދާކުރަމުން ދިޔަ އޮފިސަރެކެވެ. ބާރު ސްޕީޑުގައި ދުއްވާފައި އައި ސައިކަލު ވަނީ ވީސީޕީގެ ބެރިކޭޑުގައި ޖެހި، އެތަނުގައި ހުރި ފުލުސް މީހާގެ ގައިގައި ޖެހިފައެވެ. މި ހާދިސާގައި ފުލުސް މީހާއަށް ވަނީ ސީރިއަސް އަނިޔާތަކެއް ލިބިފައެވެ.
މި މައްސަލައާ ގުޅިގެން ޖުމްލަ ހަތަރު މީހަކު ވަނީ ހައްޔަރުކޮށްފައެވެ. އޭގެ ތެރޭގައި ހިމެނެނީ ފުލުސް މީހާ ގައިގައި ޖެއްސި ސައިކަލުގައި ތިބި ދެ މީހުންނާއި، އެކަމާ ގުޅުން އޮތް އިތުރު ދެ މީހުންނެވެ.
ހައްޔަރުކުރި މީހުންގެ ތަފްޞީލް:
- އަޙުމަދު މާއިޝް މުޙައްމަދު މާހިރު (21 އަހަރު) – ފެނީވާ / ސ. ހިތަދޫ
- އަނޫފް ބިން މުޙައްމަދު (21 އަހަރު) – ހ. ފިލްމީސައިޓް / ކ. މާލެ
- ޢަބްދުﷲ ސައްމާޙް ޙަސަން ޞާދިޤް (20 އަހަރު) – އުއްދަނޑިމާގެ / ހދ. ކުޅުދުއްފުށި
- އަޙްމަދު ސިނާޒް (30 އަހަރު) – މަލަ / ކ. ގާފަރު
މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ އެ އެންމެންގެ ބަންދަށް 5 ދުވަހުގެ މުއްދަތެއް ދީފައެވެ. ކޯޓުން މި މައްސަލައިގައި ކުރު މުއްދަތެއް ދީފައިވަނީ، ހައްޔަރުކުރި މީހުންގެ ފަރާތުން ޤާނޫނީ ވަކީލަކު ހަމަޖެއްސުމަށް ފުރުޞަތަކަށް އެދިފައިވާތީ ކަމަށް ކޯޓުން ބަޔާންކޮށްފައިވެއެވެ.
ބަންދު އަމުރުގައި ފާހަގަކޮށްފައިވާ ގޮތުގައި، ފުލުހުންގެ ބަޔާނާއި، ސީސީޓީވީ ފޫޓޭޖް އަދި އަނިޔާވި ފުލުސް މީހާއަށް ލިބިފައިވާ އަނިޔާތަކުގެ ފޮޓޯ ރިޕޯޓަށް ބަލާއިރު، އެމީހުންގެ މައްޗަށް ތުހުމަތުކުރެވޭ މިންވަރަށް ހެކި ލިބިފައިވެއެވެ. މީގެއިތުރުން، އެމީހުންގެ ކުޑަކަމުދާތަކެތީގެ ވަގުތީ ނަތީޖާއިން މި ހަތަރު މީހުންވެސް މަސްތުވާތަކެއްޗަށް ޕޮޒިޓިވްވެފައިވާކަން ވަނީ ކަށަވަރުވެފައެވެ.
މި މައްސަލައަކީ ފުލުހުންގެ ވާޖިބަށް ހުރަސްއަޅައި، ފުރާނައަށް ނުރައްކާވާ ފަދަ ޢަމަލެއް ހިންގާފައިވާ މައްސަލައަކަށް ވާތީ، މޯލްޑިވްސް ޕޮލިސް ސަރވިސްއިން ދަނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަޙުޤީޤު ކުރަމުންނެވެ.
