އިނގިރޭސި ޕްރިމިއަރ ލީގުގެ މަޝްހޫރު ކްލަބު އާސެނަލްގެ ކުރީގެ ގޯލްކީޕަރު އެލެކްސް މެނިންގާ، އޮސްޓްރިއާގައި ހިނގި ނުރައްކާތެރި އެކްސިޑެންޓެއްގައި މަރުވެއްޖެއެވެ.
މި ހާދިސާ ހިނގާފައިވަނީ އޮސްޓްރިއާގެ ސޯލްޒްބާގްގައެވެ. އެ ސިޓީގެ ފުލުހުން މައުލޫމާތު ދޭ ގޮތުގައި، މި އެކްސިޑެންޓް ހިނގާފައިވަނީ މިއަދު ހެނދުނު 11:20 އެހައިކަންހާއިރު، ސޯލްޒްބާގުގެ ލެވެލް ކްރޮސިންއެއްގައެވެ. ލެވެލް ކްރޮސިންއަކީ އާންމު އެއްގަމު އުޅަނދުތައް ދުއްވާ މަގާއި ރޭލު ދަތުރުކުރާ ޓްރެކް ގުޅޭ ގޮތަށް އޮންނަ ހުރަސްކުރާ ސަރަހައްދެކެވެ.
އާންމު އުސޫލުން ރޭލު އަންނަ ވަގުތުތަކުގައި އެހެން އުޅަނދުތަކަށް އެ ކްރޮސިން ބަންދުވާނެއެވެ. ނަމަވެސް، މެނިންގާ ދުއްވަމުންދިޔަ ކާރު ރޭލުގައި ޖެހި މި ހާދިސާ ހިނގަން މެދުވެރިވީ ކިހިނެއްކަމެއް އަދި ސާފެއް ނުވެއެވެ.
ފުލުހުން ބުނި ގޮތުގައި އެކްސިޑެންޓްވި ވަގުތު ކާރުގައި އިނީ މެނިންގާ އެކަންޏެވެ. ހާދިސާ ހިނގި ސަރަހައްދަށް ދިޔަ އެހީތެރިން ”ޑެފިބްރިލޭޓަރ“ ބޭނުންކޮށްގެން އޭނާގެ ވިންދު އިއާދަކުރުމަށް ގިނަ މަސައްކަތްތަކެއް ކުރި ނަމަވެސް، އެ މަސައްކަތް ކާމިޔާބުވާ ގޮތެއް ވަނީ ނުވެފައެވެ.
މަރުވިއިރު އުމުރުން 48 އަހަރުގެ މެނިންގާއަކީ ފުޓުބޯޅައިގައި ފާހަގަކޮށްލެވޭ ކާމިޔާބީތަކެއް ހޯދާފައިވާ ކުޅުންތެރިއެކެވެ. އޭނާ ދުނިޔޭގެ ސަމާލުކަމަށް އައީ 1997 ވަނަ އަހަރު އާސެނަލްއާ ގުޅުނު ހިސާބުންނެވެ. އާސެނަލްގެ ޖާޒީގައި އޭނާ ފުރަތަމަ މެޗު ކުޅުނީ 1998 ވަނަ އަހަރުއެވެ. 1997 އިން 2002 އާ ދެމެދު އޭނާ ވަނީ އާސެނަލްއަށް 64 މެޗު ކުޅެދީ، އެ ޓީމާއެކު ޕްރިމިއަރ ލީގާއި އިނގިރޭސި އެފްއޭ ކަޕް ކާމިޔާބުކޮށްފައެވެ.
އޮސްޓްރިއާގެ ގައުމީ ޓީމަށް 33 މެޗު ކުޅެދީފައިވާ މެނިންގާއަކީ 2008 ވަނަ އަހަރުގެ ޔޫރޯ މުބާރާތުގައި ވާދަކުރި އެ ގައުމުގެ ސްކޮޑުގައިވެސް ހިމެނުނު މުހިންމު ކުޅުންތެރިއެކެވެ. އާސެނަލްގެ އިތުރުން އޭނާ ވަނީ ސްޕެއިންގެ އެސްޕަންޔޯލް، އިޓަލީގެ ޓޮރީނޯ، ފިއޮރެންޓީނާ، ބޮލޯނިއާ، ޔުވެންޓަސް އަދި އުދިނޭސީ ފަދަ މަޝްހޫރު ކްލަބުތަކަށް ކުޅެފައެވެ. އަދި އޭނާ ވަނީ ލިވަޕޫލާއެކު ކޮންޓްރެކްޓެއް ހަދާފައެވެ. ނަމަވެސް އެ ޓީމަށް މެޗެއް ކުޅެދީފައެއް ނުވެއެވެ.
މެނިންގާގެ ކުއްލި މަރުގެ ހަބަރާއެކު އޮސްޓްރިއާގެ ފުޓުބޯޅަ ފެޑެރޭޝަނުން ވަނީ ފުން ހިތާމައެއް ފާޅުކޮށްފައެވެ. އެ ފެޑެރޭޝަނުގެ ސްޕޯޓިން ޑިރެކްޓަރު ވިދާޅުވީ މެނިންގާއަކީ އޮސްޓްރިއާ ފުޓުބޯޅައިގެ ހަގީގީ އެމްބެސެޑަރެއް ކަމަށާއި، އޭނާ ގައުމަށް ކޮށްދިން އަގުނުކުރެވޭނެ ޚިދުމަތްތައް ތާރީޚުން ދުވަހަކުވެސް ފޮހެވިގެން ނުދާނެ ކަމަށެވެ.
