ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސްރޯޑްސް މޯލްޑިވްސްގައި ރޭ ބޭއްވި ޝަރަފުވެރި ”ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026“ ގައި އިންޑިއަން އޯޝަންސް ލީޑިން ޑެސްޓިނޭޝަންގެ މަގާމާއެކު ރާއްޖެއިން ފަސް އެވޯޑެއް ކާމިޔާބުކޮށްފިއެވެ.
މި ރަސްމިއްޔާތުގައި ރާއްޖެއަށް ލިބުނު ފާހަގަކޮށްލެވޭ އެވޯޑުތަކުގެ ތެރޭގައި އިންޑިއަން އޯޝަންސް ލީޑިން ޑެސްޓިނޭޝަންގެ އިތުރުން، ލީޑިން ޑައިވް ޑެސްޓިނޭޝަން، ލީޑިން ގްރީން ޑެސްޓިނޭޝަން އަދި ލީޑިން ހަނީމޫން ޑެސްޓިނޭޝަން 2026 ހިމެނެއެވެ. މީގެ އިތުރުން، އިންޑިއަން އޯޝަންސް ލީޑިން ޓޫރިސްޓް ބޯޑު 2026 ގެ ލަގަބު ކާމިޔާބުކޮށްފައިވަނީ ވިޒިޓް މޯލްޑިވްސް ކޯޕަރޭޝަން (ވީއެމްސީ) އިންނެވެ.
ގައުމީ ފެންވަރުގައި ލިބުނު އެވޯޑުތަކުގެ އިތުރުން، ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 15 އަށް ވުރެ ގިނަ ބްރޭންޑަކުން ވަނީ އިންޑިއާ ކަނޑުގެ އެކި ދާއިރާތަކުން އެވޯޑްތައް ހާސިލުކޮށްފައެވެ. އޭގެ ތެރޭގައި ރިސޯޓްތަކާއި، ލަގްޒަރީ ހޮސްޕިޓަލިޓީ، އޭވިއޭޝަން، ޑައިވިން އަދި އާއިލީ ދަތުރުތަކާއި ހަނީމޫންގެ އިތުރުން ޕްރައިވެޓް އައިލެންޑް ތަޖުރިބާތަކާއި ސުޕަ ޔޮޓް ފަތުރުވެރިކަމާއި ޒިންމާދާރު ފަތުރުވެރިކަމުގެ ދާއިރާތައް ހިމެނެއެވެ.
ދުނިޔޭގެ 40 އަށް ވުރެ ގިނަ ގައުމުން ފަތުރުވެރިކަމުގެ ދާއިރާގެ އިސް ފަރާތްތަކާއި ވޯލްޑް ޓްރެވަލް އެވޯޑްސްގެ ފައުންޑާ އަދި ޕްރެޒިޑެންޓް ގްރަހަމް ކުކް ބައިވެރިވެވަޑައިގަތް މި ރަސްމިއްޔާތުގައި، ޓޫރިޒަމް އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން ވަނީ ވާހަކަދައްކަވާފައެވެ.
މިނިސްޓަރުގެ ވާހަކަފުޅުގައި، 1972 ވަނަ އަހަރު އެންމެ ދެ ރިސޯޓާއެކު ފެށުނު ރާއްޖޭގެ ފަތުރުވެރިކަން މިއަދު ދުނިޔޭގެ އެންމެ ކާމިޔާބު އެއް ވާހަކައަށް ވެފައިވާކަން ފާހަގަކުރެއްވިއެވެ. އަދި ރާއްޖެ އިޝްތިހާރު ކުރުމުގައި ވިޒިޓް މޯލްޑިވްސްއިން ކުރަމުންދާ މަސައްކަތްތަކަށް ތައުރީފު ކުރައްވައި، ދެމެހެއްޓެނިވި ފަތުރުވެރިކަމެއް ކުރިއެރުވުމުގެ މުހިންމުކަމުގެ މައްޗަށް އަލިއަޅުވާލެއްވިއެވެ.
މި ކާމިޔާބީއާ ގުޅޭގޮތުން ވިޒިޓް މޯލްޑިވްސްގެ ސީއީއޯ އަދި މެނޭޖިން ޑައިރެކްޓަރު އަބްދުﷲ ޔާސިރު ވިދާޅުވީ، ރާއްޖެއަށް ލިބުނު ފަސް އެވޯޑަކީ ދިވެހި ފަތުރުވެރިކަމުގެ ސިނާއަތުގެ ވަރުގަދަކަމާއި މުއްސަނދިކަން ސާބިތުކޮށްދޭ ކަމެއް ކަމަށެވެ. އަދި މިއީ ދުނިޔޭގެ ފަތުރުވެރިންނަށް ރާއްޖެއިން ފޯރުކޮށްދޭ ފެންވަރު ރަނގަޅު ހިދުމަތްތަކާއި ތަފާތު ތަޖުރިބާތަކުގެ އަގުވަޒަންކުރުން ކަމުގައި އޭނާ ފާހަގަކުރެއްވިއެވެ.
