ތިނަދޫ ސިޓީގެ މޭޔަރު، ސައުދު އަލީގެ މައްޗަށް ދައުލަތުން އުފުލާފައިވާ ދެ ދައުވާއެއްގެ ޝަރީއަތް މާދަމާ ކްރިމިނަލް ކޯޓުގައި ފެށުމަށް ތާވަލުކޮށްފިއެވެ. މި މައްސަލަތަކުގެ އަޑުއެހުން ކޯޓުގައި ފެށުމަށް ހަމަޖެހިފައިވަނީ މާދަމާ ހެނދުނު 9:00 ގައެވެ.
މޭޔަރު ސައުދުގެ މައްޗަށް މި ދައުވާތައް އުފުލާފައިވަނީ ގދ. ތިނަދޫ ސިޓީއަކަށް ބަދަލުކުރުމަށްޓަކައި އެ ރަށުގެ އާބާދީގެ ސައްހަކަން އޮޅުވާލި ކަމަށް ތުހުމަތު ކުރެވޭ މައްސަލައިގައެވެ. މިގޮތުން އޭނާގެ މައްޗަށް ދައުލަތުން ކޮށްފައިވަނީ އެނގިހުރެ ސައްހަ ނޫން ލިޔުމެއް ދިނުމުގެ ދައުވާއާއި، ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާއެވެ.
މި ދައުވާ ސައުދު އަލީގެ މައްޗަށް ކުރަނީ ތިނަދޫއަކީ 10,000 މީހުންގެ އާބާދީއެއް ފުރިހަމަވާ ރަށެއްކަމަށް ދެއްކުމުގެ ގޮތުން، އޭނާ ސޮއިކުރައްވައި ލޯކަލް ގަވަމެންޓް އޮތޯރިޓީ (އެލްޖީއޭ) އަށް ފޮނުއްވި އާބާދީ ލިސްޓުގައި މަރުވެފައިވާ މީހުންގެ މައުލޫމާތާއި ސައްހަކަން ކަށަވަރު ނުކުރެވޭ މައުލޫމާތު ހިމަނާފައިވާތީއެވެ. އަދި އެ ލިސްޓުގައި ހިމެނޭ އެންމެންގެ އައިޑީ ކާޑު ނަންބަރު ހިމެނޭ ސައްހަ ލިސްޓެއް ހިއްސާކުރުމަށް އެލްޖީއޭ އިން އެދުމުން، އެހެން ރަށްރަށުގައި ރަޖިސްޓްރީވެފައިވާ މީހުންގެ މައުލޫމާތާއި އެއް ނަންތަކެއް ތަކުރާރުކޮށް ހިމަނައި، ތިނަދޫގެ އާބާދީއަކީ 10,150 ކަމަށް ބުނެ ސައްހަ ނޫން ލިސްޓެއް އެލްޖީއޭއަށް ފޮނުވާފައިވާ ކަމަށްވެސް ދައުވާގައިވެއެވެ. މި މައްސަލަ ސާބިތުވެއްޖެނަމަ އޭނާގެ މައްޗަށް 1 އަހަރާއި 7 މަހާއި 6 ދުވަހުގެ ޖަލު ހުކުމެއް އަންނާނެއެވެ.
މި ދައުވާ އޭނާގެ މައްޗަށް އުފުލީ، މި މައްސަލައިގެ ތަހުގީގަށް ތިނަދޫއަށް ސިޓީގެ ދަރަޖަ ހޯދުމަށް ދައުލަތުގެ އިދާރާތަކަށް ހުށަހެޅި އާބާދީ ލިސްޓުތައް ހިއްސާކުރުމަށް ފުލުހުން އެދުމުން، އެ ލިސްޓުތައް ފޯރުކޮށްނުދީ، ސިޓީގެ ދަރަޖަ ހޯދުމަށް ދައުލަތުގެ އެއްވެސް އިދާރާއަކަށް ލިސްޓެއް ފޮނުވިކަން ރެކޯޑު ކުރެވިފައިނުވާ ކަމަށް ބުނެ، ސައުދު ސޮއިކުރައްވައި ފުލުހުންނަށް ފެކްސް މެދުވެރިކޮށް ދޮގު މައުލޫމާތު ދެއްވާފައިވާތީއެވެ. މި ކުށް ސާބިތުވެއްޖެނަމަ އޭނާއަށް 4 މަހާއި 24 ދުވަހުގެ ޖަލު ހުކުމެއް އަންނާނެއެވެ.
ތިނަދޫ ސިޓީއެއްގެ ގޮތުގައި ކަނޑައެޅީ ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި، 2023 ވަނަ އަހަރުގެ އޮގަސްޓް މަހުގެ 20 ވަނަ ދުވަހުއެވެ. ނަމަވެސް ތިނަދޫއަކީ ސިޓީއެއްގެ ގޮތުގައި ކަނޑައެޅީ ގާނޫނާ ހިލާފަށް ކަމަށް ވިދާޅުވެ، ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ ވަނީ މި މައްސަލަ ރައްޔިތުންގެ މަޖިލީހަށާއި އެލްޖީއޭއަށްވެސް ހުށަހަޅުއްވާފައެވެ.
