އޭޝިއާ ބައްރުގެ މީހުންނަށް އާންމުކޮށް ދިމާވާ ހަންގަނޑު ކަޅުވުމުގެ މައްސަލައަކީ ގިނަ ބަޔަކު ކުރާ ފިކުރެކެވެ. ޚާއްސަ ގޮތެއްގައި އުޅަބޮށްޓާއި ކިހިލިފަތް، އަދި އުކުޅުވަޅު ފަދަ ހަށިގަނޑުގެ ވަކިވަކި ސަރަހައްދުތައް ކަޅުވުމަކީ ގިނަ ފަހަރު ލަދުގަންނަ ކަމެއްގެ ގޮތުގައި ފެންނަ މައްސަލައެކެވެ. މިފަދަ ހާލަތްތަކުގައި ޑޮކްޓަރަށް ދައްކަން ލަދުގަންނަ މީހުންނަށް ގެއިން ފަސޭހައިން ފަރުވާ ދެވޭނެ ބައެއް ގޮތްތައް މިވަނީ ހުށަހަޅާފައެވެ.
ހަމުގެ ޑޮކްޓަރުން ބުނާގޮތުގައި ހަންގަނޑު ކަޅުވުމުގެ މައިގަނޑު ސަބަބުތަކުގެ ތެރޭގައި ހޯމޯނަލް އިންބެލެންސްއާއި، ހަންގަނޑަށް ދިމާވާ އެހެން މައްސަލަތަކުގެ އިތުރުން ފަލަވުން ހިމެނެއެވެ. މިފަދަ ސަބަބުތަކާ ގުޅިގެން ހަންގަނޑުގައި ކަޅުކަން އުފެދުމަކީ ދިވެހިރާއްޖެ ފަދަ އޭޝިއާގެ ގައުމުތަކުގައި ވަރަށް އާންމުކޮށް ފެންނަ މަންޒަރެކެވެ.
ކަޅުވެފައި ހުންނަ ހަންގަނޑު އަލިކުރުމަށް ގޭގައި ދެވިދާނެ ބައެއް ފަރުވާތައް ތިރީގައި މިވަނީއެވެ.
1. ކާށިތެޔޮ އަދި ލުނބޯ ހުތް:
ހަންގަނޑުގައި ކަޅުވެފައިވާ ސަރަހައްދު އެންމެ ފަސޭހައިން އަލިކޮށްލެވޭނެ އެއް ގޮތަކީ ލުނބޮލުގެ ހުތް ބޭނުންކުރުމެވެ. ލުނބޯއަކީ އޭގައި ގިނައަދަދަކަށް ވިޓަމިން ”ސީ“ އެކުލެވޭ އެއްޗެއް ކަމުން، ހަންގަނޑު އަލިކުރުމަށް ވަރަށް ރަނގަޅެވެ. ލުނބޯ ހުތާއި ކާށިތެޔޮ އެއްކުރުމަށްފަހު، ހަންގަނޑުގައި ކަޅުވެފައިވާ ސަރަހައްދުގައި އުނގުޅާލާށެވެ. 10-15 މިނެޓް ވަންދެން ބެހެއްޓުމަށްފަހު ދޮވެލާށެވެ. ކަޅުކަން ފިލައިގެން ދަންދެން މިފަރުވާ ބޭނުންކުރެވިދާނެއެވެ.
2. ބޭކިންގ ސޮޑާ:
ބޭކިންގ ސޮޑާއާއި ފެންފޮދެއް އެއްކޮށް ޕޭސްޓެއް ތައްޔާރުކުރުމަށްފަހު، ކަޅުވެފައިވާ ސަރަހައްދުގައި އުނގުޅާށެވެ. 10-15 މިނެޓްފަހުން ދޮވެލާށެވެ. ބޭކިންގ ސޮޑާއަކީ ބާރުގަދަ މާއްދާއެއް ކަމުން، ހަންގަނޑުގައި އުނގުޅުމުގެ ކުރިން ކުޑަ ތަނެއްގައި ޓެސްޓްކޮށްލުން ރަނގަޅުކަމަށް ހަމުގެ އެކްސްޕާޓުން އިރުޝާދު ދެއްވައެވެ.
3. އަލޮވެރާ:
އަލޮވެރާއަކީ ހަންގަނޑުގެ މައްސަލަތަކަށް ޖާދޫއެއް ފަދަ އެއްޗެކޭވެސް ބުނެވިދާނެއެވެ. ހަންގަނޑުގައި ކަޅުވެފައިވާ ނުވަތަ ހަލާކުވެފައި ހުންނަ ތަންތަނަށް އަލޮވެރާ ޖެލްކޮޅެއް އުނގުޅާލުމުން، ހަންގަނޑު ރަނގަޅުވެ އަލިކޮށްދެއެވެ. ކަޅުވެފައި ހުންނަ ސަރަހައްދުގައި އަލޮވެރާ ޖެލްކޮޅެއް އުނގުޅާލުމަށްފަހު ހިކެންދެން ބަހައްޓާށެވެ. އަލޮވެރާގައި ހިމެނޭ ”އެލޮއިން“ އަކީ ހަންގަނޑު އަލިކޮށް ރީތިކޮށްދޭ މާއްދާއެކެވެ.
4. އަލުވި:
އަލުވީގައި ހިމެނޭ ”ކެޓެކޮލޭސް“ ކިޔާ މާއްދާއަކީ ހަންގަނޑު އަލިކޮށް ރީތިކޮށްދޭ މާއްދާއެކެވެ. އަލުއްވެއް ފޮތިކޮށްފައި ހަންގަނޑުގައި ކަޅުވެފައިވާ ސަރަހައްދުގައި އުނގުޅާށެވެ. 10 މިނެޓްވަންދެން އަލުވިފޮތިން ހަންގަނޑު މަސާޖްކުރުމަށްފަހު ދޮވެލާށެވެ.
ހަށިގަނޑުގައި ފޮރުވިފައިވާ ސަރަހައްދުތައް ކަޅުވުން ފަދަ ކަންކަން ދިމާވީމަ އަޅުގަނޑުމެންނަށް ގިނަ ފަހަރު ޑޮކްޓަރަށް ދެއްކުމަށް ދާންފަސްޖެހި އެވާހަކަ ދައްކަން ލަދުގަނެއެވެ. އެފަދަ ހާލަތެއްގައި މަތީގައި މިގެނެސްދެވުނު ރެމެޑީތައް ބޭނުންކޮށްގެން އަޅުގަނޑުމެން އަމިއްލައަށް ގޭގައި ފަރުވާދެވިދާނެއެވެ. ނަމަވެސް، މައްސަލަ އިތުރަށް ގޯސްވެ، މިފަދަ ފަރުވާތަކުން ނަތީޖާއެއް ނުލިބޭނަމަ، ހަމުގެ ޑޮކްޓަރެއްގެ ލަފާ ހޯދުން މުހިންމެވެ.
