އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ، ދޯހާގައި ހިންގި ގި ޑްރޯން ހަމަލާއެއްގައި 16 މީހުން މަރުވެ އަދި އެތައް ބަޔަކަށް އަނިޔާވުމާ ގުޅިގެން ގަތަރަށް މަޢާފަށް އެދިއްޖެއެވެ.
އިސްރާއީލުން ބުނާ ގޮތުގައި މި ހަމަލާގެ މަޤްޞަދަކީ ގަތަރުގެ ވެރިރަށް ދޯހާގައި ޙަރަކާތްތެރިވާ ކަމަށް ބެލެވޭ ހަމާސްގެ އޮފިޝަލުންނަށް އަމާޒުކުރުން ކަމަށްވާއިރު، މި ހަމަލާއާ ގުޅިގެން މުޅި ސަރަޙައްދުގައި ފުޅާ ދާއިރާއެއްގައި ކުށްވެރިކުރުން އިތުރުވެފައިވެއެވެ. ދޯހާއިން މި ހަމަލާ ވަރަށް ހަރުކަށި އިބާރާތުން ކުށްވެރިކޮށް، މިއީ އެ ޤައުމުގެ މިނިވަންކަމާއި ބައިނަލްއަޤްވާމީ ޤާނޫނުތަކާ ޚިލާފު ޢަމަލެއް ކަމަށް ބުނެފައިވެއެވެ.
ގަތަރުގެ ސަރުކާރުން އިސްރާއީލުގެ ޗާޖް ޑެފެއާޒް ގެނެސް، ޖަވާބުދާރީވުމަށް އެދި، މި ހަމަލާގައި އާންމު ރައްޔިތުންވެސް ހިމެނޭކަން ފާހަގަކޮށްފައިވެއެވެ. އަދި މި ގޮލްފު ޤައުމުން އަރަބި ލީގުގެ ކުއްލި ބައްދަލުވުމަކަށް ގޮވާލައި، އދ އިން ވަގުތުން ފިޔަވަޅު އެޅުމަށް އެދިފައިވެއެވެ.
ޓެލެވިޜަނުން ދެއްކި ބަޔާނެއްގައި ނެތަންޔާހޫ އާންމުންގެ މަރުތަކާ ގުޅިގެން ”ފުން ހިތާމައެއް“ ފާޅުކޮށް، މި ހަމަލާ ދެވިފައިވަނީ ”ނުބައި އިންޓެލިޖެންސް“ ގެ މައްޗަށް ބިނާކޮށްގެން ކަމަށާއި، އެތެރޭގެ ތަޙްޤީޤެއް ކުރިއަށްދާ ކަމަށް ބުނެފައިވެއެވެ. އަދި އިތުރަށް ކަންކަން ގޯސްވިޔަ ނުދިނުމަށް ގަތަރުގެ އިސްވެރިންނާއެކު މަސައްކަތްކުރުމަށް އިސްރާއީލް ތައްޔާރަށް ހުރިކަން އޭނާ ފާހަގަކޮށްފައިވެއެވެ.
ބައިނަލްއަޤްވާމީ ފެންވަރުގައި މިކަމާ ގުޅިގެން އަވަސް ރައްދުތަކެއް ދެވިފައިވެއެވެ. އދ ގެ ސެކްރެޓަރީ ޖެނެރަލް މި ހަމަލާ ”ޤަބޫލުކުރެވޭނެ ކަމެއް ނޫން“ ކަމަށް ބުނެ، ހަމަޖެހުމަށް ގޮވާލާފައިވެއެވެ. އަދި ދޯހާއާއި އެހެނިހެން އަރަބި ވެރިރަށްތަކުގައި މުޒާހަރާތައް ފެށި، މުޒާހިރުން ޖަވާބުދާރީވުމަށާއި ފަލަސްޠީނު ސަރަޙައްދުން ބޭރުގައި އިސްރާއީލުގެ ހަނގުރާމަވެރި ޢަމަލުތައް ހުއްޓާލުމަށް ގޮވާލާފައިވެއެވެ.
އިސްރާއީލުގެ ހަނގުރާމަވެރި މަޤްޞަދުތައް ސާފުކޮށްދިނުމަށާއި، މިފަދަ ހާދިސާތައް ތަކުރާރުނުވާނެކަން ސަރަޙައްދުގެ ބައިވެރިންނަށް ޔަޤީންކަން ދިނުމަށް އިސްރާއީލަށް ކުރެވޭ ޕްރެޝަރު އިތުރުވަމުންދާ ދަނޑިވަޅެއްގައި މި މަޢާފަށް އެދުން އައިސްފައިވަނީއެވެ.
