އިނގިރޭސި ޕްރިމިއާ ލިގުގައި ރޭ ކުޅުނު ފޯރިގަދަ މެޗުން އެވަޓަން އަތުން 3-0 ގެ ނަތީޖާއަކުން ބަލިވެ، ޗެލްސީއަށް ބޮޑު ނުތަނަވަސްކަމަކާ ކުރިމަތިލާން ޖެހިއްޖެއެވެ.
އެވަޓަންގެ ހިލް ޑިކިންސަން ސްޓޭޑިއަމްގައި ކުޅުނު މި މެޗަށް ޗެލްސީ ނިކުތްއިރު، އެ ޓީމުގެ ކޯޗު ލިއާމް ރޮޒޭނިޔާއަށް ވަނީ ފާޑުކިއުންތައް ވަރަށް ބޮޑަށް އަމާޒުވެފައެވެ. ވަކިން ހާއްސަކޮށް ޔޫއެފާ ޗެމްޕިއަންސް ލީގުގެ ދެވަނަ ބުރުން 8-2 ގެ އެގްރިގޭޓް ނަތީޖާއަކުން ބަލިވެ މުބާރާތުން ކަޓާފައިވުމުން، ކޯޗުގެ މުސްތަގުބަލާ މެދު ވަނީ ސުވާލު އުފެދިފައެވެ.
މެޗުގެ ފުރަތަމަ ހާފުގައި އެވަޓަން އިން ވަނީ ރަނގަޅު ކުޅުމެއް ދައްކާފައެވެ. އެގޮތުން މެޗުގެ 33 ވަނަ މިނިޓުގައި ބެޓޯ ވަނީ ލަނޑެއް ޖަހައި އެވަޓަންއަށް ކުރި ހޯދައިދީފައެވެ. މި ލަނޑާއެކު ފުރަތަމަ ހާފު ނިމުނީ 1-0 އިން އެވަޓަން ކުރީގައި އޮވެގެންނެވެ.
ދެވަނަ ހާފު ފަށައިގެން ޗެލްސީން ނަތީޖާ ހަމަހަމަކުރުމަށް މަސައްކަތް ކުރި ނަމަވެސް، އެދެވޭ ކުޅުމެއް ދެއްކޭ ގޮތެއް ނުވިއެވެ. މެޗުގެ 62 ވަނަ މިނިޓުގައި ބެޓޯ ވަނީ އޭނާގެ ދެވަނަ ލަނޑު ކާމިޔާބުކޮށް، އެވަޓަންގެ ފަރަގު ބޮޑުކޮށްދީފައެވެ. މި ލަނޑާއެކު ބެޓޯ ވެފައިވަނީ އެވަޓަންގެ އައު ސްޓޭޑިއަމްގައި އެއް މެޗެއްގައި ދެ ލަނޑު ޖެހި ފުރަތަމަ ކުޅުންތެރިޔާއަށެވެ.
އެވަޓަންގެ ތިންވަނަ ލަނޑު މެޗުގެ 76 ވަނަ މިނިޓުގައި ފެނިގެންދިޔައީ ބެޓޯ ދިން ފުރުސަތަކުން އިލިމަން އެންޑިޔާއޭ ކާމިޔާބުކުރި ރީތި ލަނޑުންނެވެ.
މި ބައްޔާއެކު ޗެލްސީ ވަނީ ހުރިހާ މުބާރާތެއްގައި އެންމެ ފަހުން ކުޅުނު ހަތަރު މެޗުންވެސް ބަލިވެފައެވެ. މިއީ ކުރިއަށް އޮތް ސީޒަނުގައި ޔޫރަޕްގެ މުބާރާތަކުން ފުރުސަތު ހޯދުމަށް މަސައްކަތްކުރާ ޗެލްސީއަށް ލިބުނު ވަރަށް ބޮޑު ނާކާމިޔާބީއެކެވެ.
މި ނަތީޖާއާއެކު، ތާވަލުގެ އަށްވަނައިގައި އެވަޓަން އޮތީ 46 ޕޮއިންޓާއެކުގައެވެ. ޗެލްސީ 48 ޕޮއިންޓާއެކު އަދިވެސް އޮތީ ތާވަލުގެ ހަވަނަ މަގާމުގައެވެ. ނަމަވެސް މި ބައްޔާއެކު ގަދަ ހަތަރެއްގެ އުންމީދު އެ ޓީމަށް ވަނީ އިތުރަށް ހަނިވެފައެވެ.
