މީގެ ފަސް އަހަރު ކުރިން މެދުކަނޑާލާފައިވާ އިންޑިއާ އާއި ޗައިނާގެ މެދުގައި ކުރެވޭ ބޯޑަރު ވިޔަފާރި އަލުން ފެށުމާ ގުޅޭގޮތުން ދެ ގައުމުގެ ފޮރިން މިނިސްޓްރީގެ އޮފިޝަލުން މިހާރު މަޝްވަރާ ކުރައްވަމުން ގެންދަވާ ކަމަށް މީޑިއާ ރިޕޯޓްތައް ބުނެފިއެވެ. މިކަން އިއުލާނުކޮށްފައި މިވަނީ، އެމެރިކާގެ ޓެރިފް ސިޔާސަތުތަކުގެ ސަބަބުން ދުނިޔޭގެ ވިޔަފާރިއަށް ބޮޑެތި ބަދަލުތަކެއް އަންނަމުންދާ މި ނާޒުކު ދަނޑިވަޅެއްގައެވެ.
ދުނިޔޭގެ އެންމެ އާބާދީ ބޮޑު ދެ ގައުމު ކަމަށްވާ އިންޑިއާ އާއި ޗައިނާ އަކީ ދެކުނު އޭޝިއާގައި ސްޓްރެޓެޖިކް ގޮތުން ނުފޫޒު ބޮޑުކުރުމަށް ވާދަވެރި ދެ ގައުމެވެ. މި ދެގައުމުގެ މެދުގައި، ފިނި އަދި އުސް ހިމާލަޔަން ބޯޑަރު ހުރަސްކޮށް ކުރާ ވިޔަފާރި ނިސްބަތުން މަދު ނަމަވެސް، މިކަން އަލުން ފެށުމަކީ ސިޔާސީ ގޮތުންނާއި އިގްތިސާދީ ގޮތުން ވެސް މުހިންމު ރަމްޒީ ކަމެއް ކަމަށް ބެލެވެއެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ޓެރިފް ސިޔާސަތުތަކާ ހެދި ދުނިޔޭގެ ވިޔަފާރީގެ މައްސަލަތައް އިތުރުވެ، ޖިއޮޕޮލިޓިކަލް ހަމަނުޖެހުންތައް ހޫނުވެފައިވާ މި ދަނޑިވަޅުގައި، ދެ ގައުމުގެ ގުޅުން ރަނގަޅުކުރުމަށްޓަކައި މިފަދަ ފިޔަވަޅުތައް މިހާރު ގެންދަނީ އަޅަމުންނެވެ.
މި މަޝްވަރާތަކާ ގުޅިގެން، އިންޑިއާގެ ފޮރިން މިނިސްޓަރު ސުބްރަމާނިއަމް ޖައިޝަންކަރު މިދިޔަ ޖުލައި މަހު ޗައިނާއަށް ކުރެއްވި ދަތުރަށް ފަހު، ޗައިނާގެ ފޮރިން މިނިސްޓަރު ވަންގް ޔީ އަންނަ ހަފްތާގައި އިންޑިއާއަށް ވަޑައިގަތުމަށް ހަމަޖެހިފައިވާ ކަމަށްވެސް މީޑިއާގައި ވަނީ ރިޕޯޓްކޮށްފައެވެ.
މި ދަތުރުގައި، 2020 ވަނަ އަހަރު ދެ ގައުމުގެ އަސްކަރީ ފައުޖުތަކުގެ މެދުގައި ހިނގި ހަމަނުޖެހުމަށް ފަހު މެދުކަނޑާލާފައިވާ ސީދާ ފްލައިޓްތައް އަލުން ފެށުމާއި ޓޫރިސްޓް ވިސާ ދޭން ފެށުން ފަދަ ކަންކަންވެސް މަޝްވަރާކުރާނެ ކަމަށް ބެލެވޭނެއެވެ. މިކަންކަމުގެ ސަބަބުން ދެ ގައުމުގެ ގުޅުން އިތުރަށް ބަދަހިވެ، އިގްތިސާދީ ގުޅުންތައް ފުޅާވެގެންދާނެ ކަމަށް ލަފާކުރެވެއެވެ.
