ފަލަސްޠީނުގެ ބިންތަކަށް ވެރިވެގަނެގެން އުޅޭ ސަހުޔޫނީންގެ މެދުގައި ބޮޑު ބިރުވެރިކަމެއް އުފެދި، ގިނަ އަދަދެއްގެ ބަޔަކު އެ ބިންތައް ދޫކޮށް ފިލަން ފަށައިފިއެވެ. މިހާރު އިޒުރޭލުގެ ވައިގެ ބަނދަރުތައް ވަނީ ބޭރަށް ފުރަންދާ ސަހުޔޫނީންނުން ތޮއްޖެހިފައެވެ.
ޚަބަރު ލިބޭގޮތުގައި އިޒުރޭލުން ބޭރަށް ފުރާ ހުރިހާ ފްލައިޓްތަކެއް މިހާރު ވަނީ ފުރިފައެވެ. ސަހުޔޫނީންތައް ފިލައިގެން ދަނީ ނިއުޔޯކް، ނިއު ޖާޒީ، މަޔާމީ، ލޮސް އެންޖަލިސް، ލަންޑަން އަދި ޕެރިސް ފަދަ ހުޅަނގުގެ ބޮޑެތި ސަހަރުތަކަށެވެ. ފިލައިގެންދާ މީހުންގެ ތެރެއިން ގިނަ ބަޔަކު ބުނަމުންދަނީ ދެން ދުވަހަކުވެސް އެނބުރި އެ ބިންތަކަށް ނާންނާނެ ކަމަށެވެ.
އިޒުރޭލުގެ ކެންސެޓުން ހާމަކޮށްފައިވާ ރިޕޯޓްތަކަށް ބަލާއިރު، ފާއިތުވި އަހަރެއްހާ ދުވަހުގެ ތެރޭގައި 550,000 އަށް ވުރެ ގިނަ ސަހުޔޫނީން ވަނީ ފަލަސްޠީނުގެ ބިންތައް ދޫކޮށް ފިލައިގެން ގޮސްފައެވެ. މި މަހު ނެރުނު ރިޕޯޓެއްގައިވާ ގޮތުން، ކޮންމެ މަހަކު އެތައް ހާސް ބަޔަކު ފުރައިގެންދާއިރު، އޭގެ ތެރޭގައި ގިނައީ ޕްރޮފެޝަނަލް ގިންތީގެ މީހުންނާއި ދުއި ރައްޔިތުކަން އޮންނަ މީހުންނެވެ.
ޠެލް އަވީވު ޔުނިވާސިޓީން ނެރުނު ރިޕޯޓެއްގައި ފާހަގަކޮށްފައިވާ ގޮތުގައި، ފިލައިގެންދާ މީހުންގެ ތެރޭގައި އެންމެ ގިނައީ މެޑިކަލް ޕްރޮފެޝަނަލުންނާއި ފަންނީ ދާއިރާތަކުގެ މަސައްކަތްތެރިންނެވެ. މިއީ އިޤުތިޞާދީ ގޮތުން ފުދުންތެރި ބަޔަކަށް ވުމާއެކު، އެމީހުން ޤަޞްދުކުރަނީ ޔޫރަޕް ނުވަތަ އެމެރިކާގައި ދާއިމީ ދިރިއުޅުމެއް ބިނާކުރުމަށެވެ. ތަފާސްހިސާބުތަކުން ދައްކާގޮތުގައި 2025 ވަނަ އަހަރު ފިލައިގެން ދިޔަ މީހުންގެ ތެރެއިން އެނބުރި އައީ އެންމެ 19,000 މީހުންނެވެ. އަދި 70,000 އެއްހާ މީހުން އެނބުރި އައިސްފައެއް ނުވެއެވެ. މި އަހަރު މި ޢަދަދު އެތައް ގުނައެއް އިތުރުވާނެ ކަމަށް ބެލެވެނީ ސަލާމަތީ ކަންތައްތައް ގޯސްވެ، ދިރިއުޅުމުގެ އަގުތައް އިންތިހާއަށް އުފުލިފައިވާތީއެވެ.
މީގެ އިތުރުން، ސަހުޔޫނީންގެ މެދުގައި ނުތަނަވަސްކަން އިތުރުވެފައިވަނީ ޕާކިސްތާނުގެ އިސްލާމްއާބާދުގައި އެމެރިކާއާއި އީރާނާ ދެމެދު ކުރިއަށްދާ މަޝްވަރާތަކުގެ ސަބަބުންނެވެ. އިޒުރޭލުގެ ބައިވެރިވުމެއް ނެތި، އަދި އެމެރިކާގެ ޔަހޫދީ މަންދޫބުންގެ ހާޒިރީއާ ނުލައި ކުރިއަށްދާ މި މަޝްވަރާތަކުގެ ސަބަބުން އިޒުރޭލު މުޅިން އެކަހެރިވެ، ބަލިކަށިވެދާނެ ކަމުގެ ބިރު ވަނީ އުފެދިފައެވެ.
އިޒުރޭލަށް މިވަގުތު އޮތް ހަމައެކަނި އުންމީދަކީ ގަލްފުގެ ޢަރަބި ރަސްރަސްކަލުން އިޒުރޭލާއި އެމެރިކާއަށް އަޅުދާސްވެ، ބިރުން ތިބޭ ތިބުމެވެ. މި ޙާލަތު ދެމިއޮތުމަކީ އިޒުރޭލަށް މި ވަގުތު ލިބޭނެ ހަމައެކަނި ފައިދާ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
