ނޭޕާލްގައި މިދިޔަ އަހަރު ކުރިއަށްދިޔަ ވަރުގަދަ މުޒާހަރާތަކުގެ ބައިވެރިންނާ ދެކޮޅަށް ހިންގި ހަމަނުޖެހުންތަކުގައި ބައިވެރިވި ކަމުގެ ތުހުމަތުގައި، އެ ގައުމުގެ ކުރީގެ ބޮޑުވަޒީރު ކޭޕީ ޝަރްމާ އޮލީ އާއި ކުރީގެ ހޯމް އެފެއާޒް މިނިސްޓަރު ރަމޭޝް ލެޚާކް ހައްޔަރުކޮށްފިއެވެ.
މި ދެ ބޭފުޅުން ހައްޔަރުކޮށްފައި ވަނީ، މިދިޔަ އަހަރު އޮލީގެ ސަރުކާރު ވައްޓާލުމަށް ހިންގި ލޭއޮހުރުވުންތަކަށްފަހު ބޭއްވި ފުރަތަމަ އިންތިޚާބު ކާމިޔާބުކުރެއްވި ބަލެންދްރާ ޝާހް އާއި އޭނާގެ ކެބިނެޓް ހުވާ ކުރެއްވިތާ އެއް ދުވަސް ފަހުންނެވެ.
ކަތުމަންޑޫ ވެލީގެ ފުލުހުންގެ ތަރުޖަމާނު އޯމް އަދީކާރީ އިއްޔެ ވިދާޅުވީ، އިއްޔެ ހެނދުނުގެ ވަގުތެއްގައި އެ ދެ ބޭފުޅުން ހައްޔަރުކޮށްފައިވާ ކަމަށާއި، މި މައްސަލައިގެ ތަހުގީގާއި ގާނޫނީ މަރުހަލާތައް ކުރިއަށްދާނީ ގާނޫނާ އެއްގޮތަށް ކަމަށެވެ. ”ދަ ކަތުމަންޑޫ ޕޯސްޓް“ އިން ރިޕޯޓްކޮށްފައިވާ ގޮތުގައި، އުމުރުން 74 އަހަރުގެ އޮލީ ހައްޔަރުކުރީ ވެރިރަށް ކަތުމަންޑޫގެ ސަބާބް ބަކްތާޕޫރުގައި ހުންނަ އޭނާގެ އަމިއްލަ ގެއިންނެވެ. ހޯމް އެފެއާޒް މިނިސްޓަރު ލެޚާކް ވެސް ހައްޔަރުކޮށްފައި ވަނީ ބަކްތާޕޫރުގެ ސަރަހައްދަކުން ކަމަށް އޭނާގެ ޕާސަނަލް ސެކްރެޓަރީ ޖަނަކް ބައްޓާ ކަށަވަރުކޮށްދީފައިވެއެވެ.
މި ހައްޔަރުކުރުންތަކާ ގުޅިގެން ނޭޕާލްގެ މިހާރުގެ ހޯމް މިނިސްޓަރު ސުދާން ގުރުންގް ވިދާޅުވީ، މިއީ އެއްވެސް މީހެއްގެ ކިބައިން ބަދަލުހިފުމުގެ ނިޔަތުގައި ކުރި ކަމެއް ނޫން ކަމަށާއި، މިއީ ގައުމުގައި އިންސާފު ގާއިމުކުރުމުގެ ފެށުން ކަމަށެވެ.
ނޭޕާލްގައި މި ހަމަނުޖެހުންތައް އުފެދުނީ ސޯޝަލް މީޑިއާ ކުރު މުއްދަތަކަށް މަނާކުރުމާ ގުޅިގެންނެވެ. ނަމަވެސް، ގައުމުގައި އޮތް އިގްތިސާދީ ދަތިކަމުގެ ސަބަބުން މި މުޒާހަރާތައް މުޅި ގައުމަށް ފެތުރިގެންދިޔައެވެ. މިދިޔަ އަހަރުގެ ސެޕްޓެމްބަރު 8 އިން 9 އަށް ކުރިއަށްދިޔަ މި މުޒާހަރާތަކުގައި ގާތްގަޑަަކަށް 77 މީހުން މަރުވެފައިވާއިރު، މުޒާހަރާގެ ބައިވެރިން ވަނީ ރައްޔިތުންގެ މަޖިލީސް ކުރާ ގެއާއި ސަރުކާރުގެ ބައެއް އޮފީސްތަކުގައި އަލިފާން ޖަހާފައެވެ.
އޮލީގެ ސަރުކާރު ވެއްޓުމަށްފަހު އެކުލަވާލި ވަގުތީ ސަރުކާރުގެ ކޮމިޝަނަކުން ވަނީ މި ގަތުލުއާންމުގެ ޒިންމާ އޮލީ އާއި އިސް އޮފިޝަލުން އުފުލަންޖެހޭނެ ކަމަށް ބުނެ، އެ ބޭފުޅުންގެ މައްޗަށް ދައުވާކުރުމަށް ލަފާދީފައެވެ. ކޮމިޝަންގެ ރިޕޯޓުގައި ފާހަގަކޮށްފައިވާ ގޮތުގައި، ބަޑިޖަހަން އޮލީ ސީދާ އަމުރުކުރައްވާފައި ނުވި ނަމަވެސް، ހިނގަމުންދިޔަ ހަމަނުޖެހުންތައް ކޮންޓްރޯލްކޮށް ހުއްޓުވުމަށް އޭނާ އެކަށީގެންވާ މަސައްކަތެއް ކުރައްވާފައެއް ނުވެއެވެ.
މި ތުހުމަތުތަކާ ގުޅިގެން މީގެ ކުރިން އޮލީ ވިދާޅުވެފައިވަނީ، މުޒާހަރާގެ ބައިވެރިންނަށް ބަޑިޖެހުމަށް ސަލާމަތީ ބާރުތަކަށް އޭނާ ދުވަހަކުވެސް އަމުރުކުރައްވާފައި ނުވާނެ ކަމަށެވެ.
