ބޭންކް އޮފް މޯލްޑިވްސް (ބީއެމްއެލް) އިން އއ. އުކުޅަހުގައި އަލަށް ބްރާންޗެއް ހުޅުވައި، ޑޮލަރު އޭޓީއެމްގެ ޚިދުމަތް ރަސްމީކޮށް ފަށައިފިއެވެ. މި ޚިދުމަތްތައް ހުޅުވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އއ. އަތޮޅުގެ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
އުކުޅަހުގައި ޤާއިމުކުރި ބީއެމްއެލް އިސްލާމިކް ބްރާންޗާއި ޑޮލަރު އޭޓީއެމް ހުޅުވުމަށް މިއަދު ބޭއްވި ރަސްމިއްޔާތުގައި ބޭންކުގެ ޗެއާޕަރސަން އަޙްމަދު ޢަލީ ޙަބީބު، ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވިއެވެ. ރައީސް ވަނީ ބްރާންޗާއި އޭޓީއެމް ހުޅުއްވައިދެއްވުމަށް ފަހު އެތަން ބައްލަވާލައްވާފައެވެ.
ޑޮލަރު އޭޓީއެމް ޚިދުމަތް ރަސްމީކޮށް އިފްތިތާޙްކޮށްދެއްވުމުގެ ގޮތުން ރައީސުލްޖުމްހޫރިއްޔާ ވަނީ ޑޮލަރު އޭޓީއެމުން ރަމްޒީކޮށް ފައިސާ ނެންގެވިއެވެ. އަދި މި ބްރާންޗާއި އޭޓީއެމް ހުޅުވުމުގެ ހަނދާނުގައި އުކުޅަހު ކައުންސިލަށް ހާއްސަ ހަނދާނީ ފިލާއެއްވެސް ރައީސް ވަނީ ހަވާލުކޮށްދެއްވާފައެވެ. މި ހަނދާނީ ފިލާ ކައުންސިލުގެ ފަރާތުން ބަލައިގަތީ އުކުޅަހު ކައުންސިލްގެ ރައީސް ޝައުކަތު އިބްރާހީމެވެ.
އުކުޅަހުގައި މިހާރުވެސް ދިވެހި ރުފިޔާގެ މުޢާމަލާތްތައް ކުރެވޭ އޭޓީއެމްއެއް ހުރިއިރު، އަލަށް ޤާއިމުކުރި ޑޮލަރު އޭޓީއެމްއަކީ 24 ގަޑިއިރު ފައިސާ ނެގޭ އަދި ޖަމާ ކުރެވޭ އޭޓީއެމްއެކެވެ. ބީއެމްއެލް އިސްލާމިކް ބްރާންޗު މެދުވެރިކޮށް ބޭންކިންގ ހުރިހާ ޚިދުމަތެއްވެސް އާންމުންނަށް ލިބިގެންދާނެއެވެ.
އަލަށް ހުޅުވި ބްރާންޗާއި އޭޓީއެމްއާ ގުޅޭގޮތުން ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ، ގެސްޓް ހައުސް ޓުއަރިޒަމްގައި ވަރަށް ބޮޑަށް ކުރިއަރާފައިވާ އުކުޅަހުގައި ބޭންކުގެ ޚިދުމަތް ފުޅާވެގެން ދިއުމަކީ ލިބޭ އުފަލެއް ކަމަށެވެ. އަދި މި ޚިދުމަތްތަކުގެ ސަބަބުން އުކުޅަހާއި ކައިރި ރަށްރަށުގެ ރައްޔިތުންނާއި ވިޔަފާރިވެރިންގެ ތަރައްގީއަށް އެހީތެރިވެ، އިގްތިސާދީ ކުރިއެރުމަށް މަގުފަހިކޮށްދޭނެ މާލީ ހައްލުތައް ފަސޭހަކަމާއެކު ލިބިގެންދާނެ ކަމަށްވެސް ޝަރީފް ފާހަގަކުރެއްވިއެވެ.
މާލެއިން ބޭރުގައި ބީއެމްއެލްއިން ޑޮލަރު އޭޓީއެމް ހުޅުވި 5 ވަނަ ރަށަކީ އުކުޅަހެވެ. މީގެ ކުރިން ކ. މާފުށި، އައްޑޫސިޓީ ހިތަދޫ، ކުޅުދުއްފުށި ސިޓީ އަދި ތޮއްޑޫގައި ވަނީ ޑޮލަރު އޭޓީއެމްގެ ޚިދުމަތް ފަށާފައެވެ. ސަރުކާރާއި ގުޅިގެން ބީއެމްއެލްއިން ފަށާފައިވާ މުޅި ރާއްޖޭގައި އޭޓީއެމް ބެހެއްޓުމުގެ މަޝްރޫޢުގެ ތެރެއިން، ރާއްޖޭގެ ފަތުރުވެރިކަން ފުޅާވެފައިވާ ރަށްތަކުގައި މި ޚިދުމަތް ޤާއިމުކުރަމުން ދެއެވެ.
ބޭންކް އޮފް މޯލްޑިވްސްއިން ވިދާޅުވީ، މިހާރު އެ ބޭންކުން ރާއްޖޭގެ 20 އަތޮޅެއްގައި 42 ބްރާންޗެއް މެދުވެރިކޮށް ޚިދުމަތް ދެމުންދާނެ ކަމަށެވެ. އަދި 144 ސެލްފްސަރވިސް ބޭންކިންގ ސެންޓަރުގެ އިތުރުން 202 އޭޓީއެމް މިހާތަނަށް ބެހެއްޓި ޚިދުމަތް ދެމުންދާކަން ބީއެމްއެލްއިން ފާހަގަކުރެއެވެ. ބޭންކުގެ އަމާޒަކީ އޮންލައިން ބޭންކިންގ ހިދުމަތާއެކު އާންމު ފަރުދުންނާއި ވިޔަފާރިތަކަށް ރާއްޖޭގެ އެކި ކަންކޮޅުތަކުގައި ފަސޭހަކަމާއެކު މާލީ އެހީތެރިކަން ފޯރުކޮށްދިނުން ކަމަށް ބީއެމްއެލްއިން ވިދާޅުވިއެވެ.
