އީރާނާއި އެމެރިކާއާ ދެމެދު އަނެއްކާވެސް ނުތަނަވަސްކަން އުފެދި، ޙަމަލާތަކެއް ބަދަލުކުރަން ފެށުމާއެކު ދުނިޔޭގެ ބާޒާރުގައި ތެލުގެ އަގު މައްޗަށް ޖެހިލައިފިއެވެ. މި ބަދަލު އައިސްފައިވަނީ މެދުއިރުމަތީގެ ހަނގުރާމަ ހުއްޓާލުމަށް ދެ ޤައުމުގެ ދެމެދުގައި ކުރެވުނު އުންމީދީ މަޝްވަރާތަކަށް ހިޔަނި އެޅުމާ ގުޅިގެންނެވެ.
މެދުއިރުމަތީގެ ހަނގުރާމައަށް ދާއިމީ ނިމުމެއް ގެނައުމުގެ މަޤްޞަދުގައި އެމެރިކާގެ ރައީސް ޑޮނަލްޑް ޓްރަމްޕްއާއި އީރާނުގެ ރައީސް މަސްޢޫދު ޕެކެޝްކިއަން ވަނީ މިދިޔަ ޖޫން މަހުގެ 17 ވަނަ ދުވަހު އިބްތިދާޢީ އެއްބަސްވުމެއްގައި ސޮއިކުރައްވާފައެވެ. ނަމަވެސް، އެ އެއްބަސްވުމުގައި ހިމެނޭ ނުކުތާތައް މާނަކުރުމުގައި އުފެދުނު ދެބަސްވުންތަކާއި، އަލުން ފެށުނު ޙަމަލާތަކުގެ ސަބަބުން އެއްބަސްވުމުގެ ސައްޙަކަމާމެދު ވަނީ ސުވާލު އުފެދިފައެވެ.
މި ނުތަނަވަސްކަން އިތުރުވެގެން ދިޔައީ، ޖޫން މަހުގެ 25 ވަނަ ދުވަހު ހުރްމުޒް ކަނޑުއޮޅިން ދަތުރުކުރި ވިޔަފާރި ދެ އުޅަނދަކަށް އީރާނުން ޙަމަލާދިން ކަމަށް ބުނެ، ޖޫން 26 ވަނަ ދުވަހު އެމެރިކާގެ ސެންޓްރަލް ކޮމާންޑުން އީރާނަށް ޙަމަލާ ދިނުމާ ގުޅިގެންނެވެ. މީގެ ރައްދުގައި އީރާނުން ވަނީ ބަޙްރައިންއާއި ކުވައިތުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ޙަމަލާތަކެއް ދީފައެވެ. މި ކުރިމަތިލުންތަކަށް ފަހު، ދެ ޤައުމުން މިހާރު ވަނީ ޙަމަލާތައް ހުއްޓާލައި، މަޝްވަރާގެ މޭޒަށް އެނބުރި އައުމަށް ނިންމާފައެވެ.
މި ހާދިސާތަކާ ގުޅިގެން ބައިނަލްއަޤްވާމީ ބާޒާރުގައި ބްރެންޓް ތެލުގެ އަގު ވަނީ 0.9 އިންސައްތަ އުފުލިފައެވެ. މިއާއެކު، އޮގަސްޓް މަހު ޑެލިވަރީ ކުރުމަށް ހަމަޖެހިފައިވާ ތެޔޮ ފީފާއެއްގެ އަގު މިހާރު ހުރީ 73.21 އެމެރިކާ ޑޮލަރަށެވެ. މިއީ މިދިޔަ ފެބްރުއަރީ މަހުގެ 28 ވަނަ ދުވަހު ހަނގުރާމަ ފެށުމުގެ އެއް ދުވަސް ކުރިން ތެލުގެ އަގު ހުރި މިންވަރަށް ވުރެ 1.27 ޑޮލަރު (127 ސެންޓް) އިތުރު އަދަދެކެވެ.
ތެލުގެ ބާޒާރު ދިރާސާކުރާ އެނަލިސްޓުން ބުނާ ގޮތުގައި، އަގުތައް މިހާ ބޮޑަށް އުފުލިގެން ދިޔައީ ހަނގުރާމަ ނިމުމަކަށް އަންނަ ކަމަށް ބަލައި އިންވެސްޓަރުންނަށް މާ އަވަހަށް އުންމީދު ކުރެވުމުންނެވެ. އިބްތިދާޢީ އެއްބަސްވުމާއެކު އަގުތައް ވަގުތީ ގޮތުން ދަށަށް ދިޔަ ނަމަވެސް، ހުރްމުޒް ކަނޑުއޮޅީގައި ދެވޭ ޙަމަލާތަކުގެ ސަބަބުން ހަނގުރާމައިގެ ނުރައްކާ އަދިވެސް އޮތްކަން ހާމަވެ، ބާޒާރަށް މިވަނީ އޭގެ އަސަރު ކޮށްފައެވެ. މި ހާލަތުގެ ސަބަބުން ދުނިޔޭގެ އެންމެ މުހިންމު އެއް ކަނޑުގެ މަގު ކަމަށްވާ ހުރްމުޒް ކަނޑުއޮޅިން ކުރާ ދަތުރުތަކަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.
