ދިވެހި ފުލުހުންގެ ޚިދުމަތުގެ ދުވަސް ކުލަގަދަކޮށް ފާހަގަކުރުމުގެ ގޮތުން މާލެއާއި އަތޮޅުތެރޭގައި އެކުވެރިކަމުގެ ޚާއްޞަ ހިނގާލުމެއް ބާއްވައިފިއެވެ. ފުލުހުންގެ އެކި ބަހާތަކުން 1200 އަށް ވުރެ ގިނަ ފުލުހުންނާއި މުވައްޒަފުން މި ހިނގާލުމުގައި ބައިވެރިވެފައިވެއެވެ.
ފުލުހުންގެ ޚިދުމަތުގެ ދުވަސް ރަސްމީކޮށް ފާހަގަކުރުމަށް ކުރިއަށްގެންދާ ހަރަކާތްތައް ފެށުމުގެ ގޮތުން މާލޭގައި ބޭއްވި މި ހިނގާލުން ފަށާފައިވަނީ ޖުމްހޫރީ މައިދާނުންނެވެ. މި ހަރަކާތުގައި ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން، ކޮމިޝަނަރ އޮފް ޕޮލިސް އަޙްމަދު މުޙައްމަދު، ފުލުހުންގެ އިސްވެރިންގެ އިތުރުން ގިނަ އަދަދެއްގެ އޮފިސަރުންނާއި މުވައްޒަފުން ބައިވެރިވެވަޑައިގެންނެވިއެވެ.
ފުލުހުންގެ އަޒުމު ލައިދިނުމަށް ފަހު ފެށި މި ހިނގާލުން ކުރިއަށް ގެންގޮސްފައިވަނީ ޖުމްހޫރީ މައިދާނުން ފެށިގެން މާލޭ ވަށައިގެން ދުއްވާ މަގުތަކުން ހިނގުމަށްފަހު، އަނބުރާ ޖުމްހޫރީ މައިދާނަށް ނިންމާލާ ގޮތަށެވެ. ފުލުހުންގެ މުއައްސަސާއިން ހާމަކުރި ގޮތުގައި މިއީ ފުލުހުންގެ ޚިދުމަތުގެ ދިގު ތާރީޚާއި، ދިވެހި ރައްޔިތުންނަށް ޚިދުމަތްކުރުމުގައި ވެފައިވާ އަގުހުރި ޤުރުބާނީއާއި އިޚްލާޞްތެރިކަން ރަމްޒުކޮށްދޭ އެއްބައިވަންތަކަމުގެ ހިނގާލުމެކެވެ.
މި ދުވަސް ފާހަގަކުރުމަށްޓަކައި އާންމުންނަށް ވެސް ބައިވެރިވެވޭ ގޮތަށް ގިނަ ހަރަކާތްތަކެއް ވަނީ ރާވާފައެވެ. އެގޮތުން މާލެއާއި އަތޮޅުތަކުގައި ކުޑަކުދިންގެ ހަވީރާއި، ޢާއިލީ ހަވީރުތަކުގެ އިތުރުން ކުޅިވަރުގެ ތަފާތު ހަރަކާތްތައް ކުރިއަށްދާނެއެވެ. ޚާއްޞަ ގޮތެއްގައި ސެޕްޓެންބަރު 5 ވާ ބުރާސްފަތި ދުވަހުގެ ރޭ 08:30 ގައި ސޯޝަލް ސެންޓަރުގައި ”ބްލޫސް ފެމިލީ ނައިޓް“ ގެ ނަމުގައި ޚާއްޞަ މުނިފޫހިފިލުވުމުގެ ހަރަކާތެއް ބޭއްވުމަށް ވަނީ ހަމަޖެހިފައެވެ. މި ހަފުލާގައި ބާރަށު ޝިޔާމް، ހަބޭސް ބޮޑުބެރު ގްރޫޕް އަދި އެމްއެންއެސްޔޫގެ ފަންނުވެރިންގެ ހުށަހެޅުންތައް ފެނިގެންދާނެއެވެ.
ދިވެހިރާއްޖޭގައި ފުލުހުންގެ ޚިދުމަތް އެންމެ ފުރަތަމަ ފެށިފައިވަނީ 1933 ވަނަ އަހަރުއެވެ. އޭގެ ފަހުން ސިފައިންނާއި ފުލުހުން އެއް މުއައްސަސާއެއްގެ ގޮތުގައި ގިނަ ދުވަސްތަކަކު އޮތުމަށްފަހު، މަދަނީ ވަކި ޚިދުމަތެއްގެ ގޮތުގައި ފުލުހުންގެ މުއައްސަސާ ޤާއިމުކުރެވުނީ 2004 ވަނަ އަހަރުގެ ސެޕްޓެންބަރު މަހުގެ 1 ވަނަ ދުވަހުއެވެ. އެ ބަދަލާއެކު ފުލުހުންގެ ޚިދުމަތް ހިންގުން ދާޚިލީ ވުޒާރާގެ ދަށަށް ބަދަލުކުރެވުނެވެ.
މި ޚިދުމަތަށް ޚާއްޞަކޮށްގެން ފުރަތަމަ ޤާނޫނެއް ހެދި ޢަމަލުކުރަން ފެށުނީ 2008 ވަނަ އަހަރުއެވެ. އަދި އޭގެ ފަހުން، 2020 ވަނަ އަހަރު އެކުލަވާލެވުނު އައު ޤާނޫނުގެ ދަށުން، ޒަމާނީ ’ކޮމިއުނިޓީ ޕޮލިސިންގ‘ ގެ ފަލްސަފާގެ މައްޗަށް ބިނާކޮށް މުޅި ޚިދުމަތް ވަނީ އިތުރަށް ހަރުދަނާކޮށް ބައްޓަންކޮށްފައެވެ.
