މަސްތުވާތަކެތި ކަމަށް ޝައްކުކުރެވޭ 80 ރަބަރު ޕެކެޓާއެކު، އިންޑިގޯގެ ފްލައިޓަކުން ރާއްޖެއައި އިންޑިއާއަށް ނިސްބަތްވާ މީހަކު އިއްޔެ ފުލުހުން ހައްޔަރުކޮށްފިއެވެ.
މި މައްސަލައިގައި ފުލުހުން ހައްޔަރުކޮށްފައި ވަނީ އިންޑިއާއަށް ނިސްބަތްވާ އުމުރުން 29 އަހަރުގެ މޮހައްމަދު ޓަފެޖުލްއެވެ. އޭނާ ހައްޔަރުކޮށްފައި ވަނީ ރާއްޖެއަށް މަސްތުވާތަކެތި ސްމަގަލް ކުރުމުގެ ނުވަތަ ޓްރެފިކް ކުރުމުގެ ތުހުމަތުގައެވެ.
ކްރިމިނަލް ކޯޓުގެ ބަންދު އަމުރުގައިވާ ގޮތުން، އިއްޔެ އިންޑިގޯ ފްލައިޓުން އޭނާ ރާއްޖެ އައި ވަގުތު، ގެނައި ލަގެޖު ކަސްޓަމްސް އޮފިސަރުން އެކްސްރޭކޮށް އިތުރަށް ބަލައިފާސްކުރިއިރު ލަގެޖުތެރެއިން މަސްތުވާތަކެތި ކަމަށް ޝައްކުކުރެވޭ ޕެކެޓުތަކެއްހުރި ދެ ރަބަރު ޕެކެޓު ވަނީ ފެނިފައެވެ.
އަދި ކަސްޓަމްސްއިން އޭނާ ފުލުހުންނާ ހަވާލުކުރުމުން، ލަގެޖު އަލުން ބަލައިފާސްކުރިއިރު އެ ދެ ރަބަރު ޕެކެޓުގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި 80 ރަބަރު ޕެކެޓު ފެނިފައިވާ ކަމަށް ފުލުހުންގެ ބަޔާނުގައި ބުނެފައިވެއެވެ. މި ތަކެތީގެ ވަގުތީ ބަރުދަނުގައި 440 ގުރާމު ހުރި ކަމަށް ފުލުހުން ވަނީ ބުނެފައެވެ.
މީގެ އިތުރުން، އޭނާގެ އަތުން ފެނުނު ތަކެތީގެ ތަހުލީލު ނަތީޖާ ޓެޓްރާހައިޑްރޯކެނަބިނޯލް (ޓީއެޗްސީ) އަށް ޕޮޒިޓިވް ވެފައިވާ ކަމަށާއި، އޭގެ އަސްލު ބަރުދަނުގައި 418.99 ގުރާމު ހުރި ކަމަށްވެސް ކޯޓު އަމުރުގައި ބަޔާންކޮށްފައިވެއެވެ.
ކޯޓު އަމުރުގައިވާ ގޮތުން އޭނާ ބަންދުގައި ބެހެއްޓުމަށް ނިންމާފައި ވަނީ، މޯލްޑިވްސް ކަސްޓަމްސް ސާވިސްގެ މައްސަލަ ހުށަހަޅާ ފޯމާއި، ސީނަށް ދިޔަ ފުލުސް މީހާގެ ބަޔާނުގެ އިތުރުން މަސްތުވާތަކެތީގެ ތަހުލީލު ނަތީޖާއަށް ބަލާއިރު އޭނާގެ މައްޗަށް އެކަށީގެންވާ މިންވަރަށް ހެކި ހުށަހަޅާފައި ވާތީއެވެ. އަދި އޭނާ ހައްޔަރުކޮށްފައި ވަނީ ގާނޫނީ އިޖުރާއަތާ އެއްގޮތްވާ ގޮތުގެ މަތީން ކަމަށްވެސް ކްރިމިނަލް ކޯޓުން ވަނީ ކަނޑައަޅާފައެވެ.
އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ބަންދަށް 30 ދުވަސް ވަނީ ޖަހާދީފައެވެ. އެހެންކަމުން އޭނާގެ ބަންދުގެ މުއްދަތު ހަމަވާނީ އަންނަ އޮކްޓޯބަރު މަހުގެ ފަސް ވަނަ ދުވަހަށެވެ.
ރާއްޖެއަށް މަސްތުވާތަކެތި އެތެރެކުރުމާއި، އޭގެ ބޭނުންކޮށް ވިޔަފާރިކުރުން ވަރަށް ބޮޑަށް އިތުރުވެފައިވާ މި ދަނޑިވަޅުގައި، މިފަދަ ކަންކަން ހުއްޓުވުމަށްޓަކައި ކަސްޓަމްސްއިން އަންނަނީ ރާއްޖޭގެ ބޯޑަރު ބެލެހެއްޓުމުގެ ފިޔަވަޅުތައް ވަރަށް ބޮޑަށް ވަރުގަދަކުރަމުންނެވެ. އަދި ކަމާބެހޭ އިދާރާތައް ގުޅިގެން މަސްތުވާތަކެއްޗާ ދެކޮޅަށް ގިނަ އޮޕަރޭޝަންތަކެއްވެސް ދަނީ ހިންގަމުންނެވެ.
