އިންޑިއާގެ ވެރިރަށް ދިއްލީގައި މީހުން ދިރިއުޅޭ ފަސް ފަންގިފިލާގެ އިމާރާތެއް ވެއްޓި، ގާތްގަނޑަކަށް 50 މީހުން އިމާރާތުގެ ދަށުގައި ތާށިވެފައިވާ ކަމުގެ ބިރު އޮތް ކަމަށް އެ ގައުމުގެ އޮފިޝަލުން ހާމަކޮށްފިއެވެ.
މަންޒަރު ދުށް މީހުން އިންޑިއާގެ ނޫސްތަކަށް މައުލޫމާތު ދިން ގޮތުގައި، މި ހާދިސާ ހިނގާފައިވަނީ މިއަދު މެންދުރުފަހު 13:30 ހާއިރުއެވެ. ވެއްޓުނު އިމާރާތަކީ ދިއްލީ ޔުނިވާސިޓީ ކެމްޕަހާ ކައިރީގައި ހުންނަ އިމާރާތެއް ކަމަށްވާއިރު، އެ ތަނުގައި ގިނަ އަދަދެއްގެ ޔުނިވާސިޓީ ދަރިވަރުން ދިރިއުޅެމުންދާ ކަމަށް ރިޕޯޓުތައް ބުނެއެވެ. އަދި އިމާރާތް ވެއްޓުނު ވަގުތު އޭގެ އެތެރޭގައި ގާތްގަނޑަކަށް 50 މީހުން ތިބި ކަމަށް މަންޒަރު ދުށް ފަރާތްތަކުން ވަނީ ލަފާކޮށްފައެވެ.
ހާދިސާއާ ގުޅިގެން އިމާރާތުގެ ދަށުގައި ތާށިވެފައިވާ މީހުން ސަލާމަތް ކުރުމުގެ މަސައްކަތް ކަމާބެހޭ ފަރާތްތަކުން މިހާރު ފަށައިގެން ކުރިއަށްދާއިރު، މިހާތަނަށް މަރުވެފައިވާ ފަސް މީހެއްގެ ހަށިގަނޑު ވަނީ ފެނިފައެވެ.
’ދަ ނިއު އިންޑިއަން އެކްސްޕްރެސް‘ ނޫހުން ރިޕޯޓުކޮށްފައިވާ ގޮތުގައި، އިމާރާތުގެ ބައިތަކުގެ ދަށުން މިހާތަނަށް 11 މީހަކު ވަނީ ދިރިތިއްބާ ސަލާމަތްކޮށްގެން ނެރެފައެވެ. އަދި ސަލާމަތްކުރި މީހުންގެ ތެރެއިން ތިން މީހެއްގެ ހާލު ސީރިއަސް ކަމަށް ވެސް ރިޕޯޓުތައް ބުނެއެވެ. މީގެ އިތުރުން މީހުން ސަލާމަތްކުރުމުގެ މަސައްކަތުގައި އުޅުނު އެކަކަށް އަނިޔާވެގެން މިހާރު ފަރުވާ ދެމުން އަންނަ ކަމަށް ދިއްލީގެ ފުލުހުން ވަނީ ކަށަވަރުކޮށްދީފައެވެ.
މި ހިތާމަވެރި ހާދިސާއާ ގުޅިގެން ދިއްލީގެ މަޖިލިސް މެންބަރަކު ވިދާޅުވީ، އިމާރާތް ވެއްޓެން މެދުވެރިވި ސަބަބު ތަހުގީގު ކުރުމަށްޓަކައި މިހާރު ޚާއްސަ ކޮމިޓީއެއް އެކުލަވާލާފައިވާ ކަމަށެވެ. އަދި މި މައްސަލައިގައި އެއްވެސް ފަރާތެއްގެ އިހުމާލެއް ވާނަމަ، އެ ފަރާތްތަކާމެދު ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އަޅުއްވާނެ ކަމަށް ވެސް އޭނާ ވަނީ ވިދާޅުވެފައެވެ.
އިމާރާތުގެ ކޮންކްރީޓް ބައިތަކުގެ ދަށުގައި އިތުރު މީހުން ތާށިވެފައި ތިބި ކަމަށް ބެލެވޭތީ، ސަލާމަތީ ޚިދުމަތްތަކުން ދަނީ އެ ސަރަހައްދުގައި ހުއްޓުމެއްނެތި ހަރަކާތްތެރިވަމުންނެވެ.
