ދިވެހި ސަރުކާރާއި އިންޓަނޭޝަނަލް އިސްލާމިކް ޓްރޭޑް ފައިނޭންސް ކޯޕަރޭޝަން (އައިޓީއެފްސީ) އާ ދެމެދު 1.5 ބިލިއަން ޑޮލަރު (ގާތްގަނޑަކަށް 23.1 ބިލިއަން ރުފިޔާ) ގެ ޓްރޭޑް ފައިނޭންސިން ފްރޭމްވޯކް އެއްބަސްވުމެއްގައި މިއަދު ސޮއިކޮށްފިއެވެ.
ފިނޭންސް މިނިސްޓްރީގައި މިއަދު ބޭއްވި ހާއްސަ ރަސްމިއްޔާތެއްގައި، ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ މިނިސްޓަރ އޮފް ފައިނޭންސް އަދި އިސްލާމިކް ޑިވެލޮޕްމަންޓް ބޭންކް (އައިޑީބީ) އަށް ރާއްޖެއިން ކަނޑައަޅުއްވާފައި ހުންނަވާ ގަވަރުނަރު ހަސަން ޒަރީރެވެ. އައިޓީއެފްސީގެ ފަރާތުން ސޮއިކުރެއްވީ އެ ކޯޕަރޭޝަނުގެ ސީއީއޯ، އިންޖިނިއާ އަދީބު ޔޫސުފް އަލް-އާމާއެވެ.
ފިނޭންސް މިނިސްޓްރީން މައުލޫމާތު ދެއްވި ގޮތުގައި، ފަސް އަހަރު ދުވަހުގެ މުއްދަތަށް އެކުލަވާލެވުނު މި އެއްބަސްވުން 2026 އިން ފެށިގެން 2031 ގެ ނިޔަލަށް ދެމިގެންދާނެއެވެ. މި ފްރޭމްވޯކްގެ މައިގަނޑު މަގުސަދަކީ ރާއްޖެއަށް ބޭނުންވާ ކާބޯތަކެއްޗާއި ޒަރޫރީ އެހެނިހެން މުދާ އިމްޕޯޓްކުރުމަށް މަގުފަހިކުރުމާއި، ރާއްޖެއިން ބޭރުކުރާ އުފެއްދުންތަކުގެ ވިޔަފާރި އިތުރަށް ފުޅާކުރުމަށް މާލީ އެހީތެރިކަން ފޯރުކޮށްދިނުމެވެ.
މީގެއިތުރުން، ސަރުކާރު ހިއްސާވާ ކުންފުނިތަކަށާއި ޝަރުތު ހަމަވާ އަމިއްލަ ވިޔަފާރިތަކަށް ބޭންކުތައް މެދުވެރިކޮށް ޓްރޭޑް ފައިނޭންސިން ފެސިލިޓީތައް ހަމަޖެހިގެންދާނެ ކަމަށް ވެސް އެ މިނިސްޓްރީން ބުންޏެވެ. އަދި ވިޔަފާރީގެ ދާއިރާއިން ފަންނީ އެހީތެރިކަން ދިނުމާއި، ދިވެހި އުފެއްދުންތައް ބައިނަލްއަގުވާމީ ބާޒާރުތަކަށް ނެރުމަށް ބޭނުންވާ ގާބިލުކަން އިތުރުކުރުމުގެ މަޝްރޫއުތައް ވެސް މި އެއްބަސްވުމުގެ ދަށުން ކުރިއަށް ގެންދިއުމަށް ވަނީ ހަމަޖެހިފައެވެ.
އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން ފިނޭންސް މިނިސްޓަރު ހަސަން ޒަރީރު ވިދާޅުވީ، ވޭތުވެދިޔަ އަހަރުތަކުގައި އައިޓީއެފްސީން ރާއްޖެއަށް ދެމުންދާ އެހީތެރިކަން ވަރަށް ބޮޑަށް ފުޅާވެފައިވާ ކަމަށެވެ. އެގޮތުން ކުރިން ހަމައެކަނި ހަކަތައިގެ ދާއިރާއަށް ދެމުންދިޔަ އެހީތައް މިހާރު ވިޔަފާރިއާއި ތަރައްގީގެ އެކި ދާއިރާތަކަށް ފުޅާވެފައިވާކަން މިނިސްޓަރު ފާހަގަކުރެއްވިއެވެ. އޭގެ ތެރޭގައި ކާބޯތަކެއްޗާއި ބޭސްފަރުވާގެ ސާމާނު އެތެރެކުރުމާއި، މަސްވެރިކަމުގެ ދާއިރާއާއި ކުދި އަދި މެދު ފަންތީގެ ވިޔަފާރިތައް ކުރިއެރުވުން ހިމެނެއެވެ. އަދި ހާއްސަކޮށް 2017 ވަނަ އަހަރުން ފެށިގެން އެސްޓީއޯއަށް ފޯރުކޮށްދެމުންދާ ފެސިލިޓީގެ ސަބަބުން ރާއްޖެއަށް ބޭނުންވާ ޒަރޫރީ މުދާ މެދުނުކެނޑި އެތެރެކުރުމަށް ބޮޑު އެހީއަކަށް ވެފައިވާ ކަމަށް ވެސް މިނިސްޓަރު ވިދާޅުވިއެވެ.
ރަސްމިއްޔާތުގައި ވާހަކަދައްކަވަމުން އައިޓީއެފްސީގެ ސީއީއޯ އިންޖިނިއާ އަދީބު އަލް-އާމާ ވިދާޅުވީ، މިއަދު ސޮއިކުރެވުނު އެއްބަސްވުމަކީ ދެފަރާތުގެ ދެމެދުގައި އޮތް ގާތް ގުޅުމުގެ ނަތީޖާ ކަމަށެވެ. އަދި މި ފްރޭމްވޯކްގެ ސަބަބުން ރާއްޖޭގެ ބޭންކިން ދާއިރާއާއި އަމިއްލަ ވިޔަފާރިތަކާއެކު އޮންނަ ގުޅުން އިތުރަށް ހަރުދަނާވެގެންދާނެ ކަމަށް އެމަނިކުފާނު ވިދާޅުވިއެވެ.
މިއީ 2019 އިން 2024 އަށް އޮތް ފުރަތަމަ ފަސް އަހަރުގެ އެއްބަސްވުން ހަމަވުމާ ގުޅިގެން ސޮއިކުރި އާ އެއްބަސްވުމެކެވެ. ނިމިދިޔަ އެއްބަސްވުމުގެ ދަށުން 1.5 ބިލިއަން ޑޮލަރު ކަނޑައެޅި ނަމަވެސް، އެ މުއްދަތުގައި ރާއްޖެއިން ވަނީ 1.7 ބިލިއަން ޑޮލަރު ބޭނުންކޮށްފައެވެ. އަދި 2008 ވަނަ އަހަރުން ފެށިގެން މިހާތަނަށް އައިޓީއެފްސީން ޖުމުލަ 3.3 ބިލިއަން ޑޮލަރުގެ މާލީ އެހީތެރިކަން ރާއްޖެއަށް ފޯރުކޮށްދީފައިވެއެވެ.
އިސްލާމިކް ޑިވެލޮޕްމަންޓް ބޭންކް (އައިޑީބީ) ގްރޫޕްގެ ދަށުން ހިންގާ އައިޓީއެފްސީއަކީ އޯއައިސީގެ މެންބަރު ގައުމުތަކުގެ މެދުގައި ވިޔަފާރި ކުރިއަރުވައި އިގުތިސާދީ ހާލަތު ރަނގަޅުކުރުމަށް 2008 ވަނަ އަހަރު އުފެއްދި މުއައްސަސާއެކެވެ. މިހާތަނަށް އެ ކޯޕަރޭޝަނުން ވަނީ މެންބަރު ގައުމުތަކަށް 100 ބިލިއަން ޑޮލަރަށްވުރެ ގިނަ ފައިނޭންސިން އެހީތެރިކަން ފޯރުކޮށްދީފައެވެ.
އައިޓީއެފްސީގެ ސީއީއޯ އަދީބު އަލް-އާމާ ރާއްޖެއަށް ކުރައްވަމުން ގެންދަވާ މި ދަތުރުފުޅުގައި ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރުގެ އިތުރުން އެސްޓީއޯގެ އިސްވެރިންނާ ބައްދަލުކުރައްވައި، ރާއްޖޭގެ އިގުތިސާދީ ގުޅުންތައް ބަދަހިކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާފައެވެ. މީގެއިތުރުން އެސްޓީއޯގެ ބައެއް ފެސިލިޓީތަކަށް ވެސް އެމަނިކުފާނު ވަނީ ޒިޔާރަތްކުރައްވާފައެވެ.
