ރާއްޖޭގެ އެންމެ އުތުރުން ހއ. އުލިގަމުގައި ޔޮޓް މެރީނާއެއް ތަރައްގީކޮށް ހިންގުމަށް ޝައުގުވެރިވާ ފަރާތްތައް ހޯދުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުމުގެ ފުރުސަތު ހުޅުވާލައިފިއެވެ.
އެމްޕީއެލްއިން ބުނި ގޮތުގައި މި މަޝްރޫއުގެ މައިގަނޑު ބޭނުމަކީ އުލިގަމަކީ ފެންވަރު ރަނގަޅު މެރިޓައިމް އަދި ފަތުރުވެރިކަމުގެ މަންޒިލަކަށް ހެދުމަށްޓަކައި ތަޖުރިބާކާރު މާސްޓަރު ޑިވެލޮޕަރެއް ނުވަތަ އޮޕަރޭޓަރެއް ހޯދުމެވެ. މި މަޝްރޫއަށް ބޭނުންވާ 70،471 އަކަމީޓަރުގެ ބިން އުލިގަމު ކައުންސިލާއެކު ވެފައިވާ އެއްބަސްވުމެއްގެ ދަށުން މިހާރު ވަނީ ހަމަޖައްސާފައެވެ. އުލިގަމުގައި ޔޮޓް މެރީނާއެއް އެޅުމަށް އެމްޕީއެލާއި އެ ރަށު ކައުންސިލާ ދެމެދު އެއްބަސްވުމުގައި ސޮއިކޮށްފައިވަނީ 1 އޮގަސްޓު 2024 ގައެވެ.
މި މަޝްރޫއުގެ ދަށުން މެރީނާގެ އަސާސީ އުމްރާނީ މަސައްކަތްތައް ކުރިއަށްގެންދާނީ އެމްޕީއެލްއިންނެވެ. އޭގެ ތެރޭގައި ފަސް މީޓަރު ފުންމިނުގެ ބޭސިނަކާއި، ބްރޭކްވޯޓާ އަދި އައިއެސްޕީއެސް (ISPS) މިންގަނޑަށް ފެތޭ ބައިނަލްއަގުވާމީ އެންޓްރީ ފެސިލިޓީއެއް ގާއިމުކުރުން ހިމެނެއެވެ.
މި މަޝްރޫއާ ހަވާލުވާ ފަރާތުން މެރީނާ އޮޕަރޭޓްކުރުމުގެ އިތުރުން، ހޮޓާ ނުވަތަ ބުޓީކް ރިސޯޓާއި، ރެސްޓޯރެންޓްތަކާއި، ފަޅުވެރިންނަށް ޚާއްސަ ވަސީލަތްތަކާއި، ވޯޓަސްޕޯޓްސް އަދި ވެލްނެސް ފެސިލިޓީތައް ތަރައްގީކުރަން ޖެހޭނެއެވެ. އަދި ބައިނަލްއަގުވާމީ ފެންވަރުގައި މި މަންޒިލް އިޝްތިހާރުކޮށް، ޗާޓަރު ކުރާ ކުންފުނިތަކާ ގުޅުން ގާއިމުކުރުމަކީވެސް ޑިވެލޮޕަރުގެ ޒިންމާއެއް ކަމަށް އެމްޕީއެލްއިން މައުލޫމާތުދެއެވެ.
އިންޑިއާ ކަނޑުގެ މައި ޔޮޓް ރޫޓުތައް ކަމަށްވާ އިރުދެކުނު އޭޝިއާއާއި، މެދުއިރުމައްޗާއި، އެފްރިކާ އަދި މެޑިޓަރޭނިއަން ގުޅުވައިދޭ މަގުގައި އުލިގަން އޮންނަނީ ޖިއޮގްރަފީ ގޮތުން ވަރަށް މުހިންމު ސަރަހައްދެއްގައެވެ. އެހެންކަމުން، ކޮންމެ އަހަރަކުވެސް ރާއްޖޭން ބޭރުން އަންނަ ގިނަ އަދަދެއްގެ ޔޮޓުތައް މިހާރުވެސް އެ ރަށަށް ބަނދަރުކުރެއެވެ. ސަރުކާރުގެ މައިގަނޑު އަމާޒަކީ މި ޔޮޓުތަކަށް ރަނގަޅު ނިޒާމެއްގެ ތެރެއިން ޚިދުމަތްދީ، ރަސްމީ މެރީނާ އިގުތިސާދަކަށް މިކަން ބަދަލުކޮށް، އުތުރުގެ އިގުތިސާދު ސިންދަފާތުކޮށް ފަތުރުވެރިކަން ފުޅާކުރުމެވެ.
ވަކިވަކި ކުންފުނިތަކަށާއި ޖޮއިންޓް ވެންޗާތަކަށް މި މަޝްރޫއަށް ޝައުގުވެރިކަން ފާޅުކުރުމުގެ ފުރުސަތު ހުޅުވާލާފައިވާއިރު، އީއޯއައި ހުށަހެޅުމުގެ އެންމެ ފަހު ވަގުތަކީ މި މަހުގެ 21 ވާ ބުރާސްފަތި ދުވަހުގެ މެންދުރުފަހު 2:00 އެވެ. މަޝްރޫއާ ގުޅޭގޮތުން އެއްވެސް ސުވާލެއް އޮތްނަމަ މި މަހުގެ 16 ވާ ހޮނިހިރު ދުވަހުގެ މެންދުރުފަހު 2:00 ގެ ކުރިން އީމެއިލް މެދުވެރިކޮށް ހުށަހަޅަންޖެހެއެވެ.
ޝައުގުވެރިވާ ފަރާތްތަކުން ޕީޑީއެފް ފޯމެޓުގައި ޕްރޮޕޯސަލް ހުށަހަޅަންޖެހޭނީ އެމްޕީއެލްގެ ޓެންޑަރ އީމެއިލަށެވެ. އަދި ހުށަހަޅާ ލިޔެކިޔުންތަކުގެ ތެރޭގައި ވޭތުވެދިޔަ ތިން އަހަރުގެ އޮޑިޓްކޮށްފައިވާ މާލީ ބަޔާންތަކާއި ބޭންކް ރެފަރެންސް ސިޓީ ހިމަނަންޖެހެއެވެ.
މިއީ ވާދަވެރި ބީލަމުގެ މަރުހަލާގެ ފުރަތަމަ ފިޔަވަހި ކަމަށްވާތީ، މި ބުރުން ޝޯޓްލިސްޓުވާ ފަރާތްތަކަށް ތަފުސީލީ ޓެކްނިކަލް އަދި ފައިނޭންޝަލް ޕްރޮޕޯސަލް ހުށަހެޅުމަށް ރިކުއެސްޓް ފޯ ޕްރޮޕޯސަލް (އާރްއެފްޕީ) ފަހުން ދޫކުރާނެ ކަމަށް އެމްޕީއެލްއިން ވަނީ ބުނެފައެވެ.
