ދަރަނި ނަގަންވާނީ ކޮންމެހެން އެ ކަމަށް ބޭނުންވާ ހާލަތުގައި އެކަނި ކަމަށާއި، އެ ހާލަތުގައި ވެސް ރިބާ ހިމެނޭ ދަރަނި ނެގުމުން ދުރުހެލިވުމަށް މިއަދުގެ ހުކުރު ޚުތުބާގައި ނަސޭހަތްތެރިވެއްޖެއެވެ.
ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާ ޚާއްޞަކޮށްފައިވަނީ މާލީ މުއާމަލާތްތަކުގައި ތެދުވެރިވުމުގެ މުހިންމުކަމުގެ މައްޗަށެވެ.
ޚުތުބާގައި ފާހަގަކުރި ގޮތުގައި، މާތްﷲ އިންސާނުންނަށް ދެއްވި މަތިވެރި ނިއުމަތްތަކުގެ ތެރޭގައި މުދާ ހިމެނެއެވެ. އެއީ އިންސާނާ އަބުރުވެރި ދިރިއުޅުމެއް އުޅުމަށާއި، ދުނިޔަވީ އެންމެހައި ޙާޖަތްތައް ފުއްދުމަށް ލައްވާފައިވާ ވަސީލަތެއް ކަމަށާއި، މުދަލަކީ އިންސާނާއާ ހަވާލުކުރެވިފައިވާ އަމާނާތެއް ކަމަށް ޚުތުބާގައި ބުންޏެވެ. އެހެންކަމުން މުދަލުން ހޭދަކުރުމުގައި އިގުތިޞާދުކުރުމަކީ އިސްލާމްދީން ދައްކައިދީފައިވާ މަގެއްކަން ފާހަގަކޮށް، އިސްރާފުނުކުރުމަށާއި ދަހިވެތިނުވުމަށް ޚުތުބާގައި ވަނީ ގޮވާލާފައެވެ.
މީގެއިތުރުން، ހޭދަކުރުމުގައި މެދުމިންވުމަކީ މުދަލުގައި މާތްﷲ ބަރަކާތްލައްވައި އެ މުދާ ރައްކާތެރިކުރައްވާނޭ ކަމެއް ކަމަށާއި، އޭގެ ޚިލާފަށް އިސްރާފުކުރުމަކީ އަތްމަތި ދަތިވެ، ފުން އަނދަވަޅަކަށް އިންސާނާ ވެއްޓިގެންދާނެ ކަމެއްކަން ޚުތުބާގައި ހަނދާންކޮށްދިނެވެ.
އަދާކުރެވޭނެ ގޮތެއް ނެތި ދަރަނި ނަގާ މައްސަލައަށް އަލިއަޅުވާލަމުން ޚުތުބާގައި ބުނީ، ދަރަނީގެ މުޢާމަލާތަކީ އެ ކަމާ މެދު ނުހަނު ސަމާލުވާންޖެހޭ ކަމެއް ކަމަށެވެ. އަދި ދަރަންޏަކީ ދަރަނިވެރިޔާގެ ބޮލުގައި އެޅިފައިވާ އަމާނާތެއް ކަމަށާއި، އެއީ ދަރަނިދޭ މީހާގެ ޙައްޤެއް ކަމަށް ވެސް ބުންޏެވެ.
”ދަރަނި ނަގާންވާނީ ކޮންމެހެން އެ ކަމަށް ބޭނުންވެ އެ ދެއްކޭނޭ މަގު ތަނަވަސްވެފައިވާ ނަމައެވެ. އަދި މި ފަދައިން ދަރަންޏެއް ނަގާން ޖެހޭ ޙާލަތެއް މެދުވެރިވެއްޖެ ނަމަ، ރިބާ ހިމެނޭ ދަރަނިތަކާ ދުރުހެލިވާށެވެ! އެހެނީ ރިބާގެ މުޢާމަލާތްތަކުން ދުރުހެލިވުމަކީ ކޮންމެ މުސްލިމެއްގެ މައްޗަށް ވާޖިބުވެގެންވާ ކަމެކެވެ،“ ޚުތުބާގައި ބަޔާންކޮށްފައިވެއެވެ.
ހަމައެއާއެކު، މީސްތަކުންގެ މެދުގައި ވެވޭ މާލީ އެއްބަސްވުންތަކަށް އިޙުތިރާމުކުރުމާއި އެ އެއްބަސްވުންތަކަށް ތަބާވުމަކީ ވާޖިބެއް ކަމަށް ޚުތުބާގައި ބުންޏެވެ. އޭގެ ތެރޭގައި ދަރަންޏާއި، ގަނެވިއްކުމާއި، ކުއްޔަށްދިނުމުގެ އިތުރުން އެއްމެދު އެއްބަސްވުންތައް ހިމެނޭކަން ފާހަގަކުރިއެވެ.
ޚުތުބާގައި އިތުރަށް ބުނީ، ހަރުދަނާކަމާއެކު މާލީ މުޢާމަލާތްތައް ކުރުމަކީ ތިމާގެ ޙިކުމަތްތެރިކަމުގެ ޢަލާމާތެއް ކަމަށާއި، އެއީ ޢާއިލާއާއި މުޅި މުޖުތަމަޢު ހަރުދަނާވުމަށް މަގުފަހިވާ ކަމެއް ކަމަށެވެ. އެހެންކަމުން، އަހަރެމެންގެ އެންމެހައި މާލީ ކަންކަމަކީ ﷲ ގެ ޙަޟުރަތާ ކުއްތަންވުމުގެ ތެރޭގައި ހިމެނޭ ކަންކަމަށް ހަދަންޖެހޭ ކަމަށް ޚުތުބާގައި ވަނީ ބާރުއަޅާފައެވެ.
މިއަދުގެ ޚުތުބާ ނިންމާލާފައިވަނީ، އެންމެހައި މުސްލިމުންގެ މުދަލުގައި ބަރަކާތްލައްވައި، ހެޔޮ ގޮތުގައި މުދާ ހޯދުމާއި ހޭދަކުރުމުގެ މަގު ފަހިކޮށްދެއްވައި، ސީދާވެގެންވާ ހެޔޮ މަގުން ހިނގުމުގެ ތައުފީޤު ދެއްވުން އެދި މާތްﷲ ގެ ހަޟުރަތުގައި ދުޢާ ދަންނަވަމުންނެވެ.
