ރާއްޖެއިން ބޭރަށް ފުރަންގޮސް ތިބި ބަންގްލަދޭޝްގެ 6 މީހެއްގެ އަތުން ގާތްގަނޑަކަށް 3.86 މިލިއަން ރުފިޔާއަށް އަރާ ގިނަ އަދަދެއްގެ ބޭރު ފައިސާ ދިވެހި ފުލުހުންގެ ޚިދުމަތުން އަތުލައިގެންފިއެވެ.
ފުލުހުން ވިދާޅުވީ، މި މީހުން އަތުލައިގެންފައިވަނީ ގަވާއިދާ ހިލާފަށް ބޭރު ފައިސާ ގަނެވިއްކުމުގެ މުއާމަލާތްތައް ހިންގާ ފަރާތްތައް ހޯދައި، ގާނޫނީ ފިޔަވަޅު އެޅުމަށް ކުރެވެމުންދާ މަސައްކަތްތަކުގެ ތެރެއިން، މިކަމަށް ޚާއްސަކުރެވިފައިވާ ޓާސްކްފޯހަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގައެވެ. ސެޕްޓެންބަރު 18 ވަނަ ދުވަހު ވެލާނާ އިންޓަރނޭޝަނަލް އެއަރޕޯޓުގައި ހިންގި މި އޮޕަރޭޝަނުގައި އަތުލައިގަތް ފައިސާތައް މިހާރު ވަނީ ތަހުގީގުގެ ބޭނުމަށް ފުލުހުންގެ ބެލުމުގެ ދަށަށް ގެންގޮސްފައެވެ.
ހިފެހެއްޓި ފައިސާގެ ތަފްސީލަށް ބަލާއިރު، އޭގެ ތެރޭގައި 174,161 ޔޫ.އެސް ޑޮލަރާއި، 56,760 ޔޫރޯ އަދި 1,815 ސްޓަރލިންގ ޕައުންޑް ހިމެނޭހެން ޖުމުލަ 18 ގައުމެއްގެ ފައިސާ ހިމެނެއެވެ. މި ހުރިހާ ފައިސާއެއްގެ ޖުމުލަ އަގު ގާތްގަނޑަކަށް 3,861,415.29 (ތިން މިލިއަން އަށްލައްކަ ފަސްދޮޅަސް އެއްހާސް ހަތަރުސަތޭކަ ފަނަރަ ރުފިޔާ އޮނަތިރީސް ލާރި) އަށް އަރައެވެ. މި މައްސަލައާ ގުޅިގެން ބަންގްލަދޭޝްގެ 6 މީހުން ފުލުހުންގެ ބެލުމުގެ ދަށަށް ގެންގޮސްފައިވާއިރު، މި މައްސަލަ ފުލުހުން ދަނީ އިތުރަށް ތަޙުޤީޤު ކުރަމުންނެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދޫކުރާ މަނީ އެކްސްޗޭންޖް ވިޔަފާރި ހިންގުމުގެ ލައިސަންސް ނެތި، ޤާނޫނާ ޚިލާފަށް ވިޔަފާރި އުޞޫލުން ބޭރު ފައިސާ މާރުކުރުމުގެ ޢަމަލުތައް ހިންގާ ފަރާތްތަކާބެހޭ މަޢުލޫމާތު މި ޓާސްކްފޯސްއާ ހިއްސާކުރެވޭނެ ނިޒާމެއް ފުލުހުން ވަނީ ގާއިމުކޮށްފައެވެ. އެގޮތުން ލައިސަންސް ނެތި މިފަދަ ވިޔަފާރިކުރާ ފަރާތްތަކުގެ މަޢުލޫމާތު ޓާސްކްފޯސްގެ އޮޕަރޭޝަން ނަންބަރު 9388733 އަށް އެސްއެމްއެސް، ވައިބަރ، ވަޓްސްއެޕް އަދި ޓެލެގްރާމް މެދުވެރިކޮށް ހިއްސާކުރުމަށް ފުލުހުން ވަނީ އެދިވަޑައިގެންފައެވެ. އަދި މަޢުލޫމާތު ހިއްސާކުރާ ފަރާތްތަކުގެ ވަނަވަރާއި މަޢުލޫމާތުތައް ފުރިހަމައަށް ސިއްރުކޮށް ރައްކާތެރިކޮށްދޭނެ ކަމަށާއި، މަޢުލޫމާތު ދޭ ފަރާތްތަކުން ތަޙްޤީޤީ އެއްވެސް އިޖުރާއަތެއްގައި ބައިވެރިވާން ނުޖެހޭނެ ކަމުގެ ޔަގީންކަން ފުލުހުން ދެއެވެ.
ރާއްޖޭގެ ބޭންކިން ނިޒާމަށް ފައިސާ ނުވަދެ، ނުވަތަ ވަންނަ ފައިސާ ރަސްމީ ނިޒާމުގެ ބޭރުން ކަޅު ބާޒާރުގައި މާރުކުރުމުގެ ސަބަބުން ބޭންކުތަކުގައި ބޭރުފައިސާ ދައުރުވާ މިންވަރު ވަނީ ދަށްވެފައެވެ. މިކަމުގެ ސަބަބުން ވިޔަފާރިތަކަށް ބޭނުންވާ ބޭރުފައިސާ ކަޅު ބާޒާރުން އަގުބޮޑުކޮށް ގަންނަން ޖެހި، މުދަލުގެ އަގު އުފުލި އަދި އާންމުންގެ ޒަރޫރީ ބޭނުންތަކަށް ބޭރުފައިސާ ލިބުމުގައި ބޮޑެތި ދަތިތަކާ ކުރިމަތިވެއެވެ.
ސަރުކާރުގެ މައިގަނޑު އަމާޒަކީ ޤާނޫނުތަކަށް ގެނެވޭ އިސްލާހުތަކާއި ހަރުދަނާ ފިޔަވަޅުތަކުގެ އެހީގައި މި މައްސަލައަށް ދާއިމީ ހައްލެއް ހޯދައި، ރައްޔިތުންނަށް ކަނޑައެޅިފައިވާ ރަސްމީ ރޭޓުގައި ފަސޭހަކަމާއެކު ބޭރުފައިސާ ލިބޭނެ އިންތިޒާމު ހަމަޖައްސައިދިނުމެވެ.
