ހދ. ހިރިމަރަދޫ ރައްޔިތުން އެ އަތޮޅު ހަނިމާދޫއަށް ބަދަލުކުރުމުގެ މަސައްކަތް ސަރުކާރުން ފަށާފައިވާ ދަނޑިވަޅެއްގައި، ހިރިމަރަދޫގައި މިހާރު ލިބިފައިވާ ގޯއްޗެއް އެހެން ފަރާތެއްގެ ނަމަށް ބަދަލުކުރުމާއި، ގޯތި ބައިކުރުމާއި، އެއްމެދު ކުރުންފަދަ، ގޯތީގެ ރަޖިސްޓްރީއަށް ބަދަލު އަންނަ އެއްވެސް ކަމެއް ނުކުރެއްވުމަށް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން އިލްތިމާސް ކުރައްވައިފިއެވެ.
މި އިލްތިމާސް މި ކުރެއްވީ، ހިރިމަރަދޫ ރައްޔިތުންގެ ދިރިއުޅުމުގެ ޙާލަތު ރަނގަޅުކުރުމަށާއި، އެރަށު ހުރިހާ ރައްޔިތުންނަށް އެކަށީގެންވާ ގެދޮރާއި ޒަމާނީ ވަސީލަތްތައް ފޯރުކޮށްދިނުމުގެ ގޮތުން، އެ ރަށު ރައްޔިތުން ހަނިމާދޫއަށް ބަދަލުކުރުމަށް ސަރުކާރުން ނިންމެވުމާއި ގުޅިގެންނެވެ. މި ނިންމެވުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހިރިމަރަދޫ ރައްޔިތުންނާ ބައްދަލުކުރެއްވި ޖަލްސާއެއްގައި މިމަހުގެ 24 ވަނަ ދުވަހު ވަނީ އިޢުލާނުކުރައްވާފައެވެ.
އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ވިދާޅުވީ، ހިރިމަރަދޫން ހަނިމާދުއަށް ބަދަލުވާ ރައްޔިތުންގެ ތެރެއިން މިހާރު ގޯތިގެދޮރު ހުރި ކޮންމެ ރައްޔިތަކަށް ހަނިމާދޫއަށް އަލަށް ބަދަލުވާ ސަރަޙައްދުން ގެ ލިބޭނެ ކަމަށެވެ. އަދި މިހާރު ގޯތި އޮވެ އިމާރާތެއް ނެތް ކޮންމެ ރައްޔިތަކަށް ވެސް ގެ ލިބޭނެކަމުގެ ޔަގީންކަން ވުޒާރާއިން ދެއްވިއެވެ. މި މަޝްރޫޢުގެ ދަށުން ހިރިމަރަދޫން ހަނިމާދުއަށް ބަދަލުވާ އެއްވެސް ރައްޔިތަކަށް ގެދޮރު ނެތި ނުތިބޭނެކަން ކަށަވަރުކުރެވޭނެ ކަމަށް ވެސް ވުޒާރާއިން ހާމަކުރައްވައެވެ.
މި މަޝްރޫޢު ތަންފީޒުކުރުމުގެ ގޮތުން އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއެކު ފްރޭމްވޯކް އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން ހދ. ހިރިމަރަދޫގެ ރައްޔިތުންނަށް ގެދޮރު އިމާރާތްކުރުމާގުޅޭ ތަފްޞީލީ ސަރވޭތައް ހެދުމާއި، މުނިސިޕަލް އިންފްރާސްޓްރަކްޗަރ ދެނެގަތުމާއި، މުޅި މަޝްރޫޢަށް ހިނގާނެ ފުރިހަމަ ޚަރަދު ދިރާސާއާއި ބަޖެޓް ތައްޔާރުކުރުމަށް އެޗްޑީސީއާ ޙަވާލުކުރެވިފައިވެއެވެ. އެއަށްފަހު 18 މަސްދުވަހުގެ ތެރޭގައި ހިރިމަރަދޫގެ ރައްޔިތުން ހަނިމާދޫއަށް ބަދަލުކުރެވިގެން ދާނެ ކަމަށް އެ ވުޒާރާއިން ވިދާޅުވިއެވެ.
ހިރިމަރަދޫ ރައްޔިތުންނަށް ހަނިމާދޫން ގޯތި ގެދޮރު ދިނުމަށް ހަމަޖެހިފައިވަނީ، މިމަހުގެ 24 ވަނަ ދުވަހާ ހަމައަށް ގޯތި ލިބިފައިވާ ފަރާތްތަކަށް ކަމަށް ވުޒާރާއިން އިތުރަށް ހާމަކުރެއްވިއެވެ. މިކަމަށްޓަކައި، ގޯއްޗާ ގުޅޭ އެއްވެސް މުޢާމަލާތެއް ނުކުރުމަށް ވަނީ އިލްތިމާސްކުރައްވާފައެވެ.
