އިނގިރޭސި ޕްރިމިއާ ލީގުގައި ރޭ ކުޅުނު ފޯރިގަދަ މެޗުތަކަށް ފަހު ލިވަޕޫލް ލީގުގެ އެއްވަނަ އަށް އަރައިފި އެވެ. މިދިޔަ ރޭ ކުޅުނު މެޗުގައި ލިވަޕޫލުން ވަނީ ބާންލީ 1-0 އިން ބަލިކޮށްފަ އެވެ. އަދި ހަމަ އެރޭ ކުޅުނު އެހެން މެޗެއްގައި މެންޗެސްޓާ ސިޓީން އެޓީމުގެ ވާދަވެރި މެންޗެސްޓާ ޔުނައިޓެޑް 3-0 އިން ބަލިކޮށް، ސީޒަންގެ ފެށުން ދައްކުވައިދޭން ފަށައިފި އެވެ.
މި މޮޅާއެކު ލިވަޕޫލް ވަނީ ލީގުގެ އެއްވަނައިގައި ގަދަޔަށް ހިފަހައްޓާފަ އެވެ. ލިވަޕޫލް އޮތީ ކުޅުނު ހަތަރު މެޗުން ވެސް މޮޅުވެ ލިބުނު 12 ޕޮއިންޓާއެކު އެވެ. ލީގުގެ ދެ ވަނައިގައި އާސެނަލާއި، ތިން ވަނައިގައި ޓޮޓެންހަމް އަދި ހަތަރު ވަނައިގައި ބޯންމަތް އޮތީ ކޮންމެ ޓީމަކަށް 9 ޕޮއިންޓް ލިބިގެންނެވެ.
ބާންލީގެ ދަނޑުގައި ކުޅުނު ލިވަޕޫލްގެ މެޗަކީ ފަސޭހަ މެޗެއް ނޫނެވެ. މެޗުގައި ލިވަޕޫލަށް ގޯލުޖަހާނެ ފުރުސަތުތައް ތަނަވަސްކުރަން ގިނަ އުނދަގޫތަކަކާއި ކުރިމަތިލާން ޖެހުނެވެ. ނަމަވެސް މެޗުގެ އިތުރު ވަގުތުގެ ތެރޭގައި ލިވަޕޫލަށް ލިބުނު ޕެނަލްޓީއަކުން މުހައްމަދު ސަލާހު ވަނީ ފިނިކޮށް ގޯލަށް ވައްދާލައި ލިވަޕޫލް މޮޅުކޮށްދީފަ އެވެ. މި ޕެނަލްޓީ ލިވަޕޫލަށް ލިބުނީ ބާންލީގެ އޭރިއާ ތެރެއިން އެޓީމުގެ ހަނިބަލް މެޖްބްރީގެ އަތުގައި ބޯޅަ ޖެހުމާ ގުޅިގެންނެވެ.
ސިޓީގެ ދަނޑުގައި ކުޅުނު ޑާބީ މެޗުގައި މެންޗެސްޓާ ސިޓީން ވަނީ ފުރަތަމަ ހާފުގައި ފިލް ފޯޑެން ޖެހި ގޯލުން ލީޑު ނަގާފަ އެވެ. ދެވަނަ ހާފުގައި ސިޓީގެ އިތުރު ދެ ގޯލުވެސް ކާމިޔާބުކޮށްދިނީ އެޓީމުގެ އިތުބާރު ފޯވާޑް އާލިން ބްރައުޓް ހާލަންޑް އެވެ. މި މެޗުގައި މެންޗެސްޓާ ޔުނައިޓެޑަށް ގޯލުޖަހާނެ މާގިނަ ފުރުސަތުތަކެއް ތަނަވަސްކުރެވިފައެއް ނުވެ، އެޓީމުގެ ދިފާއުވެސް ފަސޭހައިން ތޮރުފައިލެވުނުކަން ފާހަގަކޮށްލެވެ އެވެ.
މި ސީޒަނުގެ ލީގުގައި މެންޗެސްޓާ ސިޓީން މިހާތަނަށް ކުޅުނު ހަތަރު މެޗުގެ ތެރެއިން ދެ މެޗުން އެޓީމު މޮޅުވިއިރު، ދެ މެޗުން ވަނީ ބަލިވެފަ އެވެ. އަނެއްކޮޅުން، މެންޗެސްޓާ ޔުނައިޓެޑުން ކުޅުނު ހަތަރު މެޗުގެ ތެރެއިން ދެ މެޗުން ބަލިވެ، އެއް މެޗުން އެއްވަރުވެ، އަދި އެއް މެޗުން ވަނީ މޮޅުވެފަ އެވެ. މިއީ މި ސީޒަނުގެ ފެށުމުގައި ޔުނައިޓެޑަށް އެހާ ރަނގަޅު ނަތީޖާއެއް ނޫން ކަމަށް ފުޓްބޯޅަ ތަޖުރިބާކާރުން ބުނެ އެވެ.
