ރާއްޖޭގެ ފުޓްބޯޅަ ސީޒަން ހުޅުވުމުގެ ގޮތުން ރޭ ކުޅުނު އެފްއޭ ޗެރިޓީ ޝީލްޑް މާޒިޔާ ސްޕޯޓްސް އެންޑް ރެކްރިއޭޝަން އިން ކާމިޔާބުކޮށްފިއެވެ. ގަލޮޅު ރަސްމީ ފުޓްބޯޅަ ދަނޑުގައި ކުޅުނު މި މެޗު މާޒިޔާއިން ކާމިޔާބުކުރީ ވާދަވެރި އީގަލްސްއާ ވާދަކޮށް 2-0 ލަނޑުންނެވެ. މިއީ މި ޝީލްޑް މާޒިޔާއިން ކާމިޔާބުކުރި ހަވަނަ ފަހަރެވެ.
ދޮޅު އަހަރަށްފަހު ރާއްޖޭގައި ފުރަތަމަ ޑިވިޝަންގެ މުބާރާތްތައް ފެށުމަށް ކުޅެވުނު މި މެޗުގައި މާޒިޔާއަށް ލަނޑުތައް ޖަހައިދިނީ އަހުމަދު އައިހަމް އާއި ނާއިޒު ހަސަން އެވެ. މި މެޗަށްފަހު، މާޒިޔާއަށް ލިބުނު ޗެރިޓީ ޝީލްޑްގެ ފައިސާގެ އެއްބައި ރާއްޖޭގައި ލޮލުގެ ފެނުމުން މަހްރޫމްވެފައިތިބޭ ކުދިންގެ ޖަމިއްޔާއަށް ހަދިޔާކުރަން ނިންމާފައިވާކަން އެޓީމުން ވަނީ ހާމަކޮށްފައެވެ.
ވާދަވެރި ކުޅުމެއް ފެނިގެންދިޔަ މެޗުގެ ފުރަތަމަ ހަމަލާ އުފެއްދީ އީގަލްސްއިންނެވެ. މެޗުގެ 12 ވަނަ މިނިޓުގައި މާޒިޔާގެ ޕެނަލްޓީ އޭރިއާ ބޭރުން އީގަލްސްގެ ބިދޭސީ ކުޅުންތެރިޔާ އުގުލީ އަބްދުލް މާލިކު ފޮނުވާލި ބޯޅަ ދިޔައީ ދަނޑިމަތިން ބޭރަށެވެ. މާޒިޔާގެ ފުރަތަމަ ނުރައްކާތެރި ހަމަލާ ފެނިގެންދިޔައީ މެޗުގެ 18 ވަނަ މިނިޓުގައެވެ. ނާއިޒު އޭރިއާތެރެއިން ފޮނުވާލި ހަމަލާ ދިޔައީ އަރިމަތީ ދަނޑިކައިރިން ބޭރަށެވެ. މެޗުގައި ދެޓީމަށް ވެސް ލަނޑު ޖަހާނެ ރަނގަޅު ފުރުސަތުތަކެއް ލިބިގެންދިޔަ ނަމަވެސް، މާޒިޔާގެ ހަމްޒާ މުހައްމަދު އާއި އީގަލްސްގެ އިބްރާހީމް ރިޒުވާންއަށް ލިބުނު ފުރުސަތުތަކުގެ ބޭނުން ހިފިފައެއް ނުވެއެވެ.
މާޒިޔާ އިން ޖެހި ފުރަތަމަ ލަނޑު ފެނިގެންދިޔައީ މެޗުގެ ފުރަތަމަ ހާފުގެ އިތުރު ވަގުތުތަކުގައެވެ. އޭރިއާ ބޭރުގައި ހުރެފައި އައިހަމް ފޮނުވާލި ބޯޅަ އީގަލްސް ކުޅުންތެރިއެއްގެ ގައިގައި ޖެހިފައި ގޯލަށް ވަނީ ވެއްދިފައެވެ.
މެޗުގެ ދެވަނަ ހާފް ފަށައިގެން 51 ވަނަ މިނިޓުގައި ފެނިގެންދިޔައީ އީގަލްސްގެ ހަމަލާއެކެވެ. އޭރިއާ ބޭރުން ފޮނުވާލި ބޯޅައިގެ ހުރަހަކަށްވީ މާޒިޔާގެ ގޯލްކީޕަރު ސާބިއަރ ނިމެންޖަރއެވެ. މާޒިޔާގެ ދެވަނަ ލަނޑު ފެނިގެންދިޔައީ މެޗުގެ 57 ވަނަ މިނިޓުގައެވެ. އޭރިއާތެރެއަށް އައިހަމް ވަދެފައި ހުރަސްކޮށްލި ބޯޅައެއް، ގޯލް އޭރިއާތެރެއިން ކީޕަރު ނުކުތް ވަގުތު އެ ބޯޅައަށް އަރައި ނާއިޒު ކާމިޔާބުކުރީއެވެ.
މާޒިޔާގެ މި ލަނޑަށްފަހު ވެސް ރިޒްވާން ވަނީ ނުރައްކާތެރި ހަމަލާއެއް މާޒިޔާ ގޯލަށް އަމާޒުކޮށް ފޮނުވާލާފައެވެ. މެޗުގެ 84 ވަނަ މިނިޓުގައި ހަމްޒާ އޭރިއާ ބޭރުން ނަގައިދިން ބޯޅަ ޒުވާން މުހައްމަދު އިލާން އިމްރާން ބޮލުން ޖައްސާލުމުން ވަނީ ގޯލްގެ ދަނޑިއަށް އަމާޒުވެފައެވެ.
މި މެޗުން މޮޅުވި މާޒިޔާއަށް ޗެރިޓީ ޝީލްޑް ހަވާލުކޮށްދެއްވީ ކުޅިވަރު ވަޒީރު އަބްދުﷲ ރާފިއުއެވެ. މާޒިޔާ އެންމެ ފަހުން ޗެރިޓީ ޝީލްޑް ކާމިޔާބުކޮށްފައިވަނީ 2020 ވަނަ އަހަރުއެވެ.
