މޯލްޑިވިއަން ޑިމޮކްރެޓިކް ޕާޓީން ރޭ ހަމަޖެހުން ނަގާލުމަށް ހިންގާފައިވާ ޢަމަލުތައް ކުށްވެރިކޮށް އެކަން ކުރި ފަރާތްތަކާއި މެދު ޤާނޫނީ ފިޔަވަޅު އެޅުމަށް ޕީޕަލްސް ނޭޝަނަލް ކޮންގްރެސް ޕީއެންސީން ގޮވާލައިފިއެވެ.
ޕީއެންސީން އެ ފަދައިން ގޮވާލާފައި ވަނީ ރޭ އެމްޑީޕީން މުޒާހަރާކުރުމުގެ ނަމުގައި ހިންގާފައި ވަނީ ޤާނޫނާއި ޚިލާފު، ހަމަނުޖެހުން އުފެއްދުމުގެ ޢަމަލުތަކެއް ކަމަށް ބުނެ އެ ޕާޓީން ނެރެފައިވާ ބަޔާނުގައެވެ.
ޕީއެންސީންގެ ބަޔާނުގައި ވަނީ މާލޭގައި އެމްޑީޕީން މުޒަހާރާ ބާއްވާފައި ވަނީ ކަމާއި ބެހޭ ފަރާތްތަކާއި މަޝްވަރާކޮށް، މުޒާހަރާ ދާނެ މަގުތަކާއި ކުރިއަށްދާނެ ގޮތާއި މެދު އެއްބަސްވެގެން ކަމަށެވެ. ނަމަވެސް އެ ޕާޓީން މި އެއްބަސްވުމާއި ޚިލާފުވެ، ފުލުހުންގެ ބެރިކޭޑްތައް ފަޅާލި ކަމަށެވެ. އަދި ފުލުހުންގެ ވާޖިބަށް ހުރަސް އަޅައި، ގަލާއި ފުޅި އުކައި ފުލުހުން ގެންގުޅުނު ޝީލްޑްތައް ފޭރިގަތުމަށް މަސައްކަތް ކުރިކަމަށެވެ.
މީގެއިތުރުން ރަށްރަށުން މުޒާހަރާއަށް ގެނެސްފައިވާ ފަރާތްތަކަށް، އަސާސީ ގޮތުން ހަމަޖައްސަން ޖެހޭ ކާނާ އާއި ހުރުން ހަމަޖައްސައި ނުދޭ ކަމުގެ މަޢުލޫމާތު ލިބިފައިވާ ކަމަށް ބުނެ ޕީއެންސީން ވަނީ އެކަމުގެ ކަންބޮޑުވުން ފާޅުކޮށްފައެވެ. މީގެ ސަބަބުން މުޒާހަރާއަށް ގެނައި މީހުން މާލޭގެ މަގުތަކުގައި ހާލުގައި ޖެހުނު ކަމަށާއި މިއީ އެމްޑީޕީން ތަމްސީލުކުރާ ރައްޔިތުންނާ މެދު ޢަމަލުކުރި ޒިންމާދާރުކަން ކުޑަ ގޮތެއް ކަމަށް ޕީއެންސީން ބަޔާނުގައިވެއެވެ.
ސަރުކާރުން އަބަދުވެސް އެއްވެ އުޅުމުގެ ޤާނޫނާއި އެއްގޮތަށް ޚިޔާލުފާޅުކުރުމަށް ފުރުސަތު ފަހިކޮށްދޭނެ ކަމަށާއި ނަމަވެސް މި ފުރުސަތަކީ ތަންތަނަށް ގެއްލުންދީ ފުލުހުންގެ ވާޖިބަށް ހުރަސްއަޅައި ފުލުހުންނަށް ހަމަލާދޭން ލިބޭ ފުރުސަތެއް ނޫން ކަމަށް ޕީއެންސީން ބަޔާނުގައި ބުނެފައިވެއެވެ. އަދި އެޕާޓީން ވަނީ އެމްޑީޕީން ބޭއްވި މުޒާހަރާއަކީ ޤައުމުގެ ހަމަޖެހުން ނަގާލުމުގެ މަޤްޞަދުގައި ބޭއްވި މުޒާހަރާއެއް ކަމަށް ބުނެފައެވެ.
ޕީއެންސީން ބުނި ގޮތުގައި ރައްޔިތުން ވޯޓުލައި މިނިވަން އިންތިޚާބެއްގައި ހޮވާފައިވާ ފަރާތްތަކަށް އެ ފުރުސަތު ދޭން ޖެހޭ ކަމަށާއި މިއާއެކު ހަޤީޤީ ސިޔާސީ މަސައްކަތްތަކަކީ މަގުމަތިން ހަމަޖެހުން ނަގާލުން ނޫން ކަމަށެވެ. އޭގެ ބަދަލުގައި ބަހުސްކޮށް ކަމާއި ގުޅޭ އިދާރާތަކަށް ހުށަހެޅުމުގެ އިތުރުން ވޯޓުން ސިޔާސީ ބަދަލު ގެނައުމަށް މަސައްކަތް ކުރަންޖެހޭ ކަމަށާއި އެނޫން ގޮތަކަށް ޢަމަލުކުރަން އުޅުމަކީ ޑިމޮކްރަސީއަށް ދެވޭ ހަމަލާއެއް ކަމަށް ޕީއެންސީގެ ބަޔާނުގައި ވަނީ ފާހަގަކޮށްފައެވެ.
