ކާށިކިރަކީ ދިވެހިންގެ ކެއިން ބުއިމުގައި ވަރަށް ގިނައިން ބޭނުންކުރާ އެއްޗެކެވެ. ތަފާތު ބާވަތުގެ ކާއެއްޗެއްސާއި ފަނި ފަދަ ތަކެތި ތައްޔާރުކުމުގައި ކާށިކިރު ބޭނުން ކުރެއެވެ.
ކާށިކިރުގައި ”ފެޓު“ ގިނަވާތީ ގިނަ ބަޔަކު ގަބޫލުކުރަމުން އައިސްފައި ވަނީ މިއީ ހަށިގަނޑަށް ގެއްލުން ހުރި އެއްޗެއް ގޮތުގައެވެ. ނަމަވެސް ޒަމާނީ ދިރާސާތަކުން ދައްކާގޮތުގައި ކާށިކިރުގައި ހަށިގަނޑަށް ފައިދާކުރުވަނިވި އެތައް މާއްދާތަކެއް އެކުލެވިގެންވެއެވެ.
ިމިއަދު މި ބަލާލަނީ ކާށިކިރުން ހަށިގަނޑަށް ލިބޭ ފައިދާތަކުގެ މައްޗަށެވެ.
ކާށިކިރަކީ ހަށިގަނޑަށް ހަކަތަ ދިނުމާއި މެޓަބޮލިޒަމް ހަރުދަނާ ކުރުމުގައި އެހީތެރިވެދޭ އެއްޗެކެވެ. ކާށިކިރުގައި ގިނަ އަދަދަކަށް މީޑިއަމް-ޗެއިން ޓްރައިގްލިސެރައިޑްސް ކިޔާ ސިއްހަތަށް ފައިދާ ހުރި ފެޓްގެ ވައްތަރެއް ހުރެއެވެ. މި ފެޓްގެ ވައްތަރު އާންމުކޮށް ކެއުމުގައި ހިމެނޭ އެހެނިހެން ފެޓްތަކާއި ތަފާތެވެ.
އެމްސީޓީއެސް އަކީ ހަށިގަނޑަށް ފަސޭހައިން ހަޖަމުވެ ސީދާ އަންނައޮނަށް ގޮސް ހަކަތައަށް ބަދަލުވާ ފެޓްތަކެކެވެ. މިއީ ހަށިގަނޑަށް އަވަހަށް ހަކަތަ ހޯދައިދޭ މާއްދާއެއް ކަމުން ކަސްރަތު ކުރާ މީހުންނާއި ހަކަތަ ބޭނުންވާ މީހުންނަށް ވަރަށް ފައިދާކުރެއެވެ. މީގެ އިތުރުން އެމްސީޓީއެސް އަކީ ހަށިގަނޑުގެ މެޓަބޮލިޒަމް ރަނގަޅުކޮށް ކެލޮރީ އަންދާ މިންވަރު އިތުރުކުރާ ކަމަށް ބައެއް ދިރާސާތަކުން ދައްކައެވެ. މިއީ ދިފާއީ ނިޒާމު ހަރުދަނާކޮށް ބަލިތަކުން ރައްކާތެރިވުމަށް އެހީތެރިވެދޭ އެއްޗެއް ވެސް މެއެވެ.
ކާށިކިރުގައި ލޯރިކް އެސިޑް ކިޔާ މާއްދާއެއް އެކުލެވިގެންވެއެވެ. މި މާއްދާއަކީ ހަށިގަނޑުގެ ދިފާއީ ނިޒާމު ވަރުގަދަ ކުރުމަށް ވަރަށް މުހިންމު ދައުރެއް އަދާކުރާ މާއްދާއެކެވެ. ލޯރިކް އެސިޑްގައި ޖަރާސީމާއި ވައިރަސް އަދި ފަންގަސް ނެތިކޮށްލުމުގެ ގާބިލިއްޔަތު ހުރެއެވެ.
ކާށިކިރުގައި އެންޓި-އޮކްސިޑެންޓްސް ވެސް އެކުލެވިގެންވެއެވެ. މިއީ ހަށިގަނޑުގައި ހިނގާ ކެމިކަލް ރިއެކްޝަންތަކުގެ ސަބަބުން އުފެދޭ ފްރީ ރެޑިކަލްތަކުން ހަށިގަނޑު ރައްކާތެރިކޮށްދީ ދިފާއީ ނިޒާމު ރަނގަޅު ކުރުމަށް އެހީތެރިވާ މާއްދާއެކެވެ.
ކާށިކިރުގައި ހަކަތަ އާއި ފެޓްގެ އިތުރުން ހަށިގަނޑަށް ބޭނުންވާ ގިނަ ވިޓަމިންތަކާއި މިނެރަލްތައް ވެސް އެކުލެވެއެވެ. އޭގެތެރޭގައި ވިޓަމިން ސީ ވިޓަމިން އީ އަދި ވިޓަމިން ބީގެ ބައެއް ވައްތަރުތައް ކާށިކިރުގައި ހިމެނެއެވެ. ކާށިކިރުގައި ދަގަނޑު (އަޔަން)، މެގްނީޒިއަމް، ފޮސްފަރަސް، ޕޮޓޭސިއަމް، ސެލެނިއަމް ފަދަ މުހިންމު މިނެރަލްތައް ވެސް ހުރެއެވެ.
މި މާއްދާތަކަކީ ހަށިގަނޑުގެ ކަށިތަކާއި މަސްތަކުގެ ސިއްހަތަށާއި ނާރުތަކުގެ މަސައްކަތަށާއި އަދި ލޭ ދައުރުވުން ރަނގަޅު ކުރުމަށް ވަރަށް މުހިންމު ދައުރެއް އަދާކުރާ މާއްދާތަކެކެވެ.
މީގެ އިތުރުން ވެސް ކާށިކިރުގައި ހަށިގަނޑަށް ބޭނުންތެރި ގިނަ މާއްދާތައް އެކުލެވިފައި ހުރުމުން އާންމު ދިރިއުޅުމުގައި ކާށިކިރު ބޭނުން ކުރުމުން މި މާއްދާތައް ހަށިގަނޑަށް ލިބޭނެއެވެ.
