ދިވެހިރާއްޖޭގެ ޤައުމީ ފުޓްބޯޅަ ޓީމު، ދެއަހަރު ފަހުން ގަލޮޅު ރަސްމީ ބޯޅަ ދަނޑުގައި ކުޅުނު ފުރަތަމަ މެޗުން، ތަޖިކިސްތާނުގެ ޤައުމީ ޓީމާ ދެކޮޅަށް ވާދަކޮށް 3-0 ގެ ނަތީޖާއަކުން ބަލިވެއްޖެއެވެ.
މިއީ 2027 ވަނަ އަހަރުގެ އޭއެފްސީ އޭޝިއަން ކަޕް ކޮލިފައިންގެ ގްރޫޕް އޭގައި މިއަދު ހަވީރު ކުޅުނު މެޗެކެވެ.
މެޗު ފެށުނުތާ ގިނައިރުތަކެއް ނުވެ، ތިން ވަނަ މިނެޓުގައި ދިވެހި ޓީމުގެ އޭރިއާ ތެރެއިން ޑިފެންޑަރު މުހައްމަދު އިރުފާން އަތުގައި ބޯޅަ ޖެހި، ތަޖިކިސްތާނަށް ވަނީ ޕެނަލްޓީއެއް ލިބިފައެވެ. ތަޖިކިސްތާނުގެ އުމަރްބައެވް ފޮނުވާލި ޕެނަލްޓީ ދިވެހި ކީޕަރު ފައިސަލް ދިފާއުކުރިނަމަވެސް، އަތުގައި ޖެހިފައި އޭރިއާ ތެރެއަށް ވެއްޓުނު ބޯޅަ ގޯލުގެ ތެރެއަށް ފޮނުވާލައިގެން ތަޖިކިސްތާނުން މެޗުގައި ލީޑު ނެގީ ހަތަރު ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ޑިފެންޑަރު ސަފަރޮވްއެވެ.
މެޗުގެ ގިނަ ވަގުތު ބޯޅަ ހިފަހައްޓައިގެން ކުޅެމުންދިޔައީ ތަޖިކިސްތާނުންނެވެ. އެހެންނަމަވެސް، މެޗުގައި ގޯލު ޖަހާނެ ރަނގަޅު ފުރުސަތުތަކެއް ދިވެހި ޓީމަށްވެސް ވަނީ ލިބިގެންގޮސްފައެވެ. މިގޮތުން، އަހުމަދު އައިހަމް އަމިއްލަ ހާފުގެތެރެއިން ހޯދި ބޯޅަ ހިފައިގެންގޮސް ތަޖިކިސްތާނުގެ އޭރިއާތެރެއަށް ވަދެ، ކީޕަރު ނިކުތުމުން ބޯމަތިން ގޯލުގެ ތެރެއަށް ހިއްލާލަން މަސައްކަތްކުރި ބޯޅަ ދިޔައީ ދަނޑިކައިރިން ބޭރަށެވެ.
ތަޖިކިސްތާނުގެ ދެވަނަ ލަނޑު ފުރަތަމަ ހާފްގެ 34 ވަނަ މިނެޓުގައި ލިބުނު ހުސްފުރުސަތަކުން ކާމިޔާބުކޮށްދިނީ ފޯވާޑް ޝެރްވޮނީއެވެ. އޭރިއާ ތެރެއިން ޝެރްވޮނީ ފޮނުވާލަން މަސައްކަތްކުރި ބޯޅައަށް ހުރަސް އަޅަން ދިވެހި ޓީމުގެ ނިހާން އާއި ސަމޫޙް ޓެކުލް ކުރިނަމަވެސް، ދެވަނަ ފަހަރަށްވެސް ބޯޅަ ލިބުނީ ޝެރްވޮނީއަށެވެ. ދެވަނަ ފަހަރަށް ލިބުނު ފުރުސަތުގެ ބޭނުން ހިފާ އޭނާ ވަނީ ލީޑު އިތުރަށް ފުޅާކޮށްފައެވެ.
މެޗުގެ ތިން ވަނަ ލަނޑުވެސް ކާމިޔާބުކޮށްދިނީ ޝެރްވޮނީއެވެ. ތަޖިކިސްތާނުގައި މިމަހުގެ 9 ވަނަ ދުވަހު ކުޅުނު މެޗުގެވެސް ފުރަތަމަ ހާފް ނިމުނީ 2-0 ސުމަކުންނެވެ. އެހެންނަމަވެސް، އެ މެޗާ ހިލާފަށް، މިމެޗުގައި ތަޖިކިސްތާނުން ވަނީ ދެވަނަ ހާފްގައިވެސް އިތުރު ލަނޑެއް ކާމިޔާބުކޮށްފައެވެ. މިލަނޑަކީ ދިވެހި ޓީމުގެ އޭރިއާ ތެރެއިން ހުސްކޮށް ލިބުނު ފުރުސަތުގައި، އިރުފާން ކައިރިވާން ފެށުމުން ޝެރްވޮނީ ބޯޅަ ގޯލަށް ފޮނުވާލުން ލަސްކޮށްލާ، އިރުފާން ކައިރިން ނައްޓާލުމަށްފަހު ކީޕަރުގެ ދުރުކަނަށް ވައްދާލައިގެން ކާމިޔާބުކުރި ހުނަރުވެރި ލަނޑެކެވެ.
މިމެޗުން ލިބުނު ތިން ޕޮއިންޓާއެކު ތަޖިކިސްތާން މިވަނީ ގްރޫޕްގައި 10 ޕޮއިންޓް ހަމަކޮށް، 2027 ވަނަ އަހަރުގެ އޭޝިއަން ކަޕް ކޮލިފައިންގައި ކުރިއަށް ޖެހިލާފައެވެ.
ގްރޫޕްގައި ދިވެހި ޓީމުން ކުޅުނު ހަތަރު މެޗުންވެސް ބަލިވިއިރު، ދިވެހި ޓީމަށް ދެން އޮންނާނީ މިއަންނަ ނޮވެމްބަރު މަހުގެ 18 ވަނަ ދުވަހު ފިލިޕީންސް އާއި ބައްދަލުކުރާ މެޗެވެ. މިމެޗުވެސް ކުޅޭނީ ގަލޮޅު ރަސްމީ ބޯޅަ ދަނޑުގައެވެ.
