ރާއްޖޭގެ ރަށްރަށް ދަތުރުފަތުރުގެ ނިޒާމަކުން ގުޅާލައި، އާއްމުނަށް ފަސޭހަކޮށްދިނުމަށް އެކުލަވާލާފައިވާ ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ޚިދުމަތް، ކުރިއަށް އޮތް 5 މަސް ދުވަހުގެތެރޭ ނުފެށި ހުރި ހުރިހާ އަތޮޅެއްގައި ފެށިގެންދާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވެފައިވަނީ، އެމަނިކުފާނު ރާއްޖޭގެ މީހުން ދިރިއުޅޭ ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން ހައްދުންމަތީ ގަމުގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ. މިއީ ރައްޔިތުންނަށް ދަތުރުފަތުރުގެ ލުއިފަސޭހަތަކެއް ހޯދައިދިނުމަށް ސަރުކާރުން އިސްކަންދެއްވާ މުހިއްމު މަސައްކަތެކެވެ.
އާރްޓީއެލްގެ ޚިދުމަތަކީ، 2022ވަނަ އަހަރު އެމްޓީސީސީއާއި ހަވާލުކޮށްގެން ފަށާފައިވާ މަޝްރޫޢެކެވެ. މި މަޝްރޫޢުގެ ދަށުން ރާއްޖެ 6 ޒޯނަކަށް ބަހާލައިގެން ޚިދުމަތް އަންނަނީ ފޯރުކޮށްދެމުންނެވެ. މިހާތަނަށް ރާއްޖޭގެ 12 އަތޮޅެއްގައި މި ޚިދުމަތް ފަށާފައިވާއިރު، އެންމެ ފަހުން އާރްޓީއެލްގެ ޚިދުމަތް ފަށާފައިވަނީ ތ. އަތޮޅުގައެވެ.
ރައީސް ޑރ. މުއިއްޒު ވިދާޅުވި ގޮތުގައި، މުޅި ރާއްޖެ އާރްޓީއެލް ފެރީގެ ނިޒާމުން ގުޅާލުމުގެ މަސައްކަތުގެ ތެރެއިން، ޚިދުމަތް ނުފެށި ހުރި އަތޮޅުތަކުގައި އެ ޚިދުމަތް ފެށުމަށް މިހާރުވެސް މަސައްކަތް ކުރަމުންދާނެއެވެ. އެގޮތުން، އަތޮޅުތަކަށް ފޮނުވަންޖެހޭ ލޯންޗު ފެރީގެ މަސައްކަތް ކުރަމުންދާކަމަށް ރައީސް ފާހަގަކުރެއްވިއެވެ. ލޯންޗުތައް ނިމޭހާ އަވަހަކަށް، ލާމު އަތޮޅުގައިވެސް އާރްޓީއެލްގެ ޚިދުމަތް ފެށިގެންދާނެކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ، ގާތްގަނޑަކަށް ފެބްރުއަރީ، މާރޗްއާއި ހިސާބަށް ދާއިރު ލާމު އަތޮޅަށާއި، ދެން ހުރި ޚިދުމަތް ނުފެށި ހުރި އަތޮޅުތަކަށްވެސް އާރްޓީއެލް ޚިދުމަތް ފެށޭނެކަމަށެވެ. ”އެހެންވީމައި އާރްޓީއެލްގެ ޚިދުމަތައް އިންތިޒާރު ކުރައްވާ ރައްޔިތުންނަށް އަޅުގަނޑު ދަންނަވާލަން ބޭނުންވަނީ އެކަން އެގޮތުގައޭ ހިނގަނީ. އެކަން އެގޮތައް ކުރިއަށްދާނެ،“ ރައީސުލްޖުމްހޫރިއްޔާ ވިދާޅުވިއެވެ.
އާރްޓީއެލް ފެރީގެ ޚިދުމަތަކީ އަތޮޅުތަކުގެ ރައްޔިތުން ދަތުރުފަތުރުކުރުމަށް ވަރަށް ބޮޑަށް ބަރޯސާވެފައިވާ ޚިދުމަތެކެވެ. ކޮންމެ އަތޮޅެއްގައި ޚިދުމަތް ފެށުމުގެ ކުރިން، އެމްޓީސީސީން ދަތުރުކުރާ ރޫޓުތަކަށް އާންމުން ހޭލުންތެރިކުރުވުމަށް ޚާއްސަ ޕްރޮގްރާމެއް ކުރިއަށްގެންދެއެވެ.
އެމްޓީސީސީން ފާހަގަކުރައްވާ ގޮތުގައި، އާރްޓީއެލްގެ ޚިދުމަތާއެކު އަތޮޅުތަކުގެ ރަށްތަކަށް އިޖުތިމާޢީ އަދި އިޤްތިޞާދީގޮތުން ބޮޑެތި ކުރިއެރުންތަކެއް އަންނަމުންދެއެވެ. ސިއްޙީ ޚިދުމަތް ހޯދުމަށް އަތޮޅުތަކުގެ ރީޖަނަލް ހޮސްޕިޓަލްތަކަށް ދަތުރުކުރުމަށްވެސް މިޚިދުމަތުގެ ބޭނުން ގިނަ ބަޔަކު ކުރެއެވެ. އާރްޓީއެލްގެ ޚިދުމަތާއެކު ރައްޔިތުންގެ ދަތުރުފަތުރުކުރުމަށް ބޮޑު ބަދަލެއް އައިސްފައިވާކަން ފާހަގަކޮށްލެވެއެވެ.
