އުތުރުގެ ރަށެއްގައި އަމިއްލަ މަންމައާއި ބައްޕައަށް އަނިޔާކޮށް، ދައްތަގެ ކަރުގައި ހިފައި އަނިޔާކުރި ދިވެހި ފިރިހެނަކު ޖަލަށްލުމަށް ކޯޓުން ހުކުމްކޮށްފިއެވެ.
މި މައްސަލައަކީ އުތުރުގެ ރަށެއްގައި އާއިލީ ހަމަނުޖެހުންތަކެއްގެ ތެރެއިން އުފަންވި މައްސަލަތަކެކެވެ. މި މައްސަލައިގައި ދައުލަތުން ވަނީ އެ ފިރިހެން މީހާގެ މައްޗަށް ތިން ދައުވާއެއް އުފުލާފައެވެ. އެއީ އަނިޔާއެއް ދިނުމުގެ ދެ ދައުވާއާއި، ރައްކާތެރިކުރުމުގެ އަމުރާ ހިލާފުވުމުގެ ދައުވާއެވެ.
އަނިޔާއެއް ދިނުމުގެ ދެ ދައުވާ އޭނާގެ މައްޗަށް އުފުލީ ބައްޕައާއި ދައްތައަށް އަނިޔާކުރި މައްސަލައާ ގުޅިގެންނެވެ. އަދި ރައްކާތެރިކުރުމުގެ އަމުރާ ހިލާފުވުމުގެ ދައުވާ އުފުލާފައިވަނީ، އޭނާގެ މަންމައަށް ގެވެށި އަނިޔާ ކުރާތީ އެކަން ހުއްޓުވުމަށް ކޯޓުން ކުރިން ނެރެފައިވާ އަމުރާ ހިލާފުވުމުންނެވެ.
މި މައްސަލައިގެ ރިޕޯޓްތަކުން އެނގޭ ގޮތުގައި، ގެވެށި އަނިޔާއިން ރައްކާތެރިކުރުމުގެ އަމުރު ނެރެފައިވަނީ މިދިޔަ ސެޕްޓެންބަރު މަހުގެ ތެރޭގައެވެ. ނަމަވެސް އެ އަމުރާ ހިލާފަށް، އޭނާ ވަނީ މަންމައާއި ބައްޕަ އަދި ދައްތައާ ދިމާލަށް ހަޅޭއްލަވައި އަޑުގަދަކޮށް، އާއިލާއަށް ބިރުދައްކާފައެވެ.
ކޯޓުގައި މި ދައުވާތަކަށް އެ ފިރިހެން މީހާ އިއުތިރާފުވެފައިވާތީ، މައްސަލަ ކުރިއަށް ގެންގޮސްފައިވަނީ އަވަސް ނިޔާގެ މައްސަލައެއްގެ ގޮތުގައެވެ.
މައްސަލަ ނިންމައި ކޯޓުން އިއްވި ހުކުމްތަކަށް ބަލާއިރު:
- ރައްކާތެރިކުރުމުގެ އަމުރާ ހިލާފުވުމުގެ ދައުވާ ސާބިތުވެ، ތިން މަސް ދުވަހުގެ ޖަލު ހުކުމެއް އިއްވި ނަމަވެސް، ކޯޓުން ވަނީ އެ ހުކުމް 29 ދުވަހަށް ލުއިކޮށްދީފައެވެ.
- ބައްޕައަށް އަނިޔާކުރި މައްސަލައިގައި އިއްވާފައިވަނީ އެއް މަހާއި ހަ ދުވަހުގެ ޖަލު ހުކުމެކެވެ.
- ދައްތަގެ ކަރުގައި ހިފައި އަނިޔާކުރި މައްސަލައިގައި އިއްވާފައިވަނީ ދެ މަހާއި 12 ދުވަހުގެ ޖަލު ހުކުމެކެވެ.
މި ހުރިހާ ދައުވާތަކެއް ސާބިތުވުމާ ގުޅިގެން އެ މީހާ މިހާރު ވަނީ ހުކުމް ތަންފީޒު ކުރުމަށް ޖަލަށްލާފައެވެ. އާއިލީ މަސްލަހަތު ހިމެނޭ މައްސަލައަކަށްވާތީ، ކޯޓުން ވަނީ މި މައްސަލައިގައި ހިމެނޭ ފަރާތްތަކުގެ ވަނަވަރު ސިއްރުކޮށްފައެވެ.
