މުޅި މެދުއިރުމަތީގެ ހަމަޖެހުމަށްޓަކައި، އީރާނާ ދެކޮޅަށް ފަށާފައިވާ ޢުދުވާނު ހުއްޓައިލުމަށް ޗައިނާއިން އެމެރިކާ އާއި ޔަހޫދީންގެ ނިރުބަވެރި ދައުލަތަށް ގޮވާލައިފިއެވެ.
ޗައިނާއިން މެދުއިރުމައްޗަށް ކަނޑައަޅާފައި ހުންނަވާ ޚާއްޞަ މަންދޫބު ޖާއީ ޖޫން، ސަޢުދީ ޢަރަބިއްޔާ، އެކުވެރި ޢަރަބި ޢިމާރާތް (ޔޫއޭއީ) އަދި ކުވެއިތަށް ކުރެއްވި ދަތުރުފުޅަށްފަހު މީޑިއާއަށް މަޢުލޫމާތު ދެއްވަމުން ވިދާޅުވީ، މި ހަނގުރާމަ ނިމުމަކަށް ގެންނަންޖެހޭނީ މި ހަނގުރާމަ ފެށި ބަޔަކު ކަމަށެވެ.
މިކަމާ ގުޅޭގޮތުން ޗައިނާގެ ޚާރިޖީ ވުޒާރާގެ ތަރުޖަމާނު ލިން ޖިޔާން ވިދާޅުވީ، މިފަދަ ޙާލަތްތަކުގައި އަސްކަރީ ބާރުގެ ބޭނުންކުރުމަކީ، ނިމުމެއް ނެތް ކުރިމަތިލުންތަކެއްގެ ތެރެއަށް ސަރަޙައްދު ވެއްޓިގެންދާނެ ފަދަ ނުރައްކާތެރި ކަމެއް ކަމަށެވެ. އޭނާ އިތުރަށް ފާހަގަކުރެއްވި ގޮތުގައި، މި ހަނގުރާމަ އިތުރަށް ދިގުލާނަމަ، މުޅި ސަރަޙައްދަށް މި ކުރިމަތިލުންތައް ފެތުރި، މުޅި މެދުއިރުމަތި ބޮޑު ހަމަނުޖެހުމެއްގެ ތެރެއަށް ވެއްޓިގެންދާނެއެވެ.
ލިން ޖިޔާންގެ ވާހަކަފުޅުގައި، މީގެ 23 އަހަރު ކުރިން އިރާޤަށް އެމެރިކާއިން އިސްވެ އަރައި ފެށި ހަނގުރާމައިގެ ހިތި ނަތީޖާއަށް އަލިއަޅުއްވާލެއްވިއެވެ. އެ ހަނގުރާމައިގެ ނޭދެވޭ އަސަރުތައް މިއަދުވެސް އިރާޤުގެ ރައްޔިތުން ތަޙައްމަލުކުރަމުންދާކަން އޭނާ ފާހަގަކުރެއްވިއެވެ. އެމެރިކާއިން ހިންގި އެ އަސްކަރީ އޮޕަރޭޝަނުގައި ސައްދާމް ޙުސައިންގެ ވެރިކަން ނިމުމަކަށް ގެނެވުނުނަމަވެސް، މުޅި ޤައުމު ހަލާކުވެ، 100,000 އަށް ވުރެ ގިނަ މީހުންގެ ފުރާނަ ގެއްލިފައިވާކަން އޭނާ ހަނދާންކޮށްދެއްވިއެވެ.
ޗައިނާއިން ބުނެފައިވަނީ އިރާޤަށް ކުރިމަތިވި ހިތްދަތި ޙާލަތުން ފިލާވަޅު ލިބިގަނެ، މަޝްރަޙު އިތުރަށް ގޯސްވުމުގެ ކުރިން އީރާނާ ދެކޮޅަށް ފަށާފައިވާ ޢުދުވާނު ވަގުތުން ހުއްޓައިލަންޖެހޭ ކަމަށެވެ.
ފެބުރުވަރީ 28 ގައި އެމެރިކާއާއި ޔަހޫދީން އިސްވެ އީރާނާ ދެކޮޅަށް ފެށި ޣައިރުޤާނޫނީ ހަނގުރާމަ ހަތަރުވަނަ ހަފުތާއަކަށް ދެމިގެން ގޮސްފައިވާއިރު، ތެހްރާނުން ދަނީ އެ ޤައުމުގެ އިސްތިޤުލާލު ދިފާޢުކުރުމަށްޓަކައި ވަރުގަދަ އަސްކަރީ ރައްދެއް ދެމުންނެވެ.
މި ހަނގުރާމައިގެ ސަބަބުން ކުރިމަތިވެފައިވާ އެންމެ ނުރައްކާތެރި އެއް މައްސަލައަކީ ހުރްމުޒް ކަނޑުއޮޅީގައި އީރާނުން ޤާއިމުކޮށްފައިވާ އަސްކަރީ ބަންދެވެ. ހުރްމުޒް ހުރަސްކޮށް ދަތުރުކުރުމަށް ތެހްރާނުން ހުރަސްއަޅަމުންދަނީ އެމެރިކާއާއި ޔަހޫދީންގެ މަޞްލަޙަތު އޮތް ކުންފުނިތަކުގެ އާގުބޯޓުފަހަރަށެވެ. ދުނިޔޭގެ ތެލާއި ގޭހުގެ ފަސްބައިކުޅަ އެއްބައި އުފުލާ މި މުހިންމު މަގު ބަންދުވުމާ ގުޅިގެން، ދުނިޔޭގެ ބާޒާރުގައި ތެލުގެ އަގު މިހާރު ވަނީ އިންތިހާއަށް އުފުލިފައެވެ.
