މެދުއިރުމަތީގައި އުފެދިފައިވާ ހަނގުރާމަވެރި ހާލަތާއި، ވަކިން ހާއްސަކޮށް އީރާނާ ގުޅޭގޮތުން ދެކެވެމުންދާ ފުށުއަރާ ވާހަކަތައް ރަޝިޔާއިން ވަރަށް ގާތުން ބަލަމުންދާ ކަމަށް އެ ގައުމުގެ ރިޔާސީ ގަނޑުވަރު، ކްރެމްލިނުން ބުނެފިއެވެ.
ކްރެމްލިންގެ ތަރުޖަމާނު ދިމިތްރީ ޕެސްކޮވް ވިދާޅުވީ، އީރާނުގެ މަސްރަހާ ގުޅޭގޮތުން އެއް ދުވަހެއްގެ ތެރޭގައި ތަފާތު އެކި ބަޔާންތައް އިވިފައިވާ ކަމަށެވެ. އަދި ރަޝިޔާއިން އެ ހާލަތު މޮނިޓަރ ކުރަމުންދާ ކަމަށާއި، މި މައްސަލައަށް އަވަސް މުސްތަގުބަލެއްގައި ސުލްހަވެރި ހައްލެއް ލިބިގެންދާނެ ކަމަށް އުންމީދު ކުރައްވާ ކަމަށްވެސް އޭނާ ވިދާޅުވިއެވެ.
ޕެސްކޮވް މިހެން ވިދާޅުވެފައިވަނީ، އެމެރިކާއާއި އީރާނާ ދެމެދު ބިނާކުރުަނިވި މަޝްވަރާތަކެއް ކުރިއަށްދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނިކޮށެވެ. ނަމަވެސް އީރާނުގެ ހާރިޖީ ވުޒާރާއިން ވަނީ އެ ވާހަކަތައް ދޮގުކޮށްފައެވެ. ފެބްރުއަރީ މަހުގެ 28 ވަނަ ދުވަހު އިސްލާމީ އުންމަތުގެ ދުޝްމަނުން ކަމުގައިވާ ޔަހޫދީންނާއި އެމެރިކާއިން ގުޅިގެން އީރާނަށް ހަމަލާދީ ހަނގުރާމަ ފެށި ފަހުން، އެފަދަ އެއްވެސް މަޝްވަރާއެއް ކުރިއަށް ގޮސްފައިވާ ކަމަށް އީރާނުން އެއްބަހެއް ނުވެއެވެ.
މީގެ ކުރިން ރައީސް ޓްރަމްޕް ވަނީ އީރާނުން ހުރުމުޒު ކަނޑުއޮޅި ފުރިހަމައަށް ހުޅުވައިނުލާ ނަމަ، އެ ގައުމުގެ ހަކަތައާ ބެހޭ މަރުކަޒުތަކަށް ހަމަލާދޭނެ ކަމުގެ އިންޒާރު ދެއްވާފައެވެ. އެ އިންޒާރަށްފަހު، އެމެރިކާއާއި ޔަހޫދީން ވަނީ އީރާނުގެ ބޫޝަހަރު ނިއުކްލިޔަރ ޕަވަރ ޕްލާންޓާ ކައިރި ސަރަހައްދަކަށް ހަމަލާދީފައެވެ. އެހެންނަމަވެސް، އެ ހަމަލާގައި ނިއުކްލިޔަރ މަރުކަޒަށް އެއްވެސް ގެއްލުމެއް ލިބިފައި ނުވާ ކަމަށް ރިޕޯޓުތައް ބުނެއެވެ.
މި ހަމަލާއާ ގުޅިގެން ކްރެމްލިނުން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ. ޕެސްކޮވް ވިދާޅުވީ ނިއުކްލިޔަރ މަރުކަޒެއް ހުންނަ ސަރަހައްދަކަށް ހަމަލާދިނުމަކީ ނުހަނު ނުރައްކާތެރި ކަމެއް ކަމަށާއި، އެކަމުގެ ސަބަބުން އިިއާދަ ނުކުރެވޭ ވަރުގެ ބޮޑެތި ގެއްލުންތައް ލިބިދާނެ ކަމަށެވެ. ރަޝިޔާގެ މި ކަންބޮޑުވުންތައް އެމެރިކާއާ ހިއްސާކޮށްފައިވާނެ ކަމަށްވެސް އޭނާ ވިދާޅުވިއެވެ.
މި މައްސަލައިގައި ބައިނަލްއަގުވާމީ އެޓޮމިކް ހަކަތައާ ބެހޭ އިދާރާ (IAEA) ގެ ޑިރެކްޓަރ ޖެނެރަލް ރަފައެލް ގްރޮސީ ވަނީ ރަޝިޔާގެ ދައުލަތުގެ ނިއުކްލިޔަރ ކުންފުނި ’ރޮސަޓޮމް‘ ގެ އިސްވެރިޔާ އެލެކްސޭ ލިކަޝެވްއާ ފޯނުން ގުޅުއްވައި މަޝްވަރާ ކުރައްވާފައެވެ. IAEA އިން ބުނި ގޮތުގައި، އެއްވެސް އަސްކަރީ ހަރަކާތެއްގެ ސަބަބުން ނިއުކްލިޔަރ ޕަވަރ ޕްލާންޓުތަކަށާއި އެތަންތަނުގައި މަސައްކަތްކުރާ މުވައްޒަފުންގެ ސަލާމަތަށް ނުރައްކާވެގެން ނުވާނެއެވެ. އަދި އެފަދަ ތަންތަނުގައި މަސައްކަތްކުރާ މީހުންނަށް ރައްކާތެރި މާހައުލެއް އޮންނަންޖެހޭނެ ކަމަށްވެސް ގްރޮސީ ވިދާޅުވެފައިވެއެވެ.
