ރާއްޖޭގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕުގައި، ސްރީލަންކާއާ ދެކޮޅަށް ކުޅުނު ފުރަތަމަ މެޗުން ބަލިވި ނަމަވެސް، ކުރިއަށް އޮތް ބޫޓާން މެޗަށް ތައްޔާރުވާއިރު ޓީމަށް ބަދަލުތަކެއް ގެންނާނެ ކަމަށް ގައުމީ ޓީމުގެ ކޯޗު އިސްތަވާާން އުރުބާނީ ބުނެފިއެވެ.
މިރޭ ބޫޓާނާ ދެކޮޅަށް ރާއްޖެ ނުކުންނައިރު، ކޯޗު އުރުބާނީ ބުނީ ޓީމަށް ބަދަލުތަކެއް ގެނައުމަކީ ނަތީޖާ ނެރުމަށްޓަކައި ކުރަންޖެހޭ ކަމެއް ކަމަށެވެ. އެގޮތުން އައު ކުޅުންތެރިންނަށް ފުރުސަތު ދިނުމާއި، ހާލަތަށް ބަލައި ކުޅުމުގެ ވައްޓަފާޅިއަށް ބަދަލު ގެނައުމަކީ އެކަށީގެންވާ ކަމެއް ކަމަށް އޭނާ ފާހަގަކުރިއެވެ.
އުރުބާނީ ބުނި ގޮތުގައި، ފުރަތަމަ މެޗުގައި ހެދުނު ގޯސްތައް ދެނެގަތުމަކީ ފަސޭހަ ކަމެކެވެ. ނަމަވެސް އެންމެ ބޮޑު ގޮންޖެހުމަކީ އެ ގޯސްތަކުން ކިހާ އަވަހަކަށް ފިލާވަޅު ލިބިގަނެ، ކުރިއަށް އޮތް ދެ މެޗުގައި އެކަންކަން އިސްލާހު ކުރުން ކަމަށް އޭނާ ބުންޏެވެ.
ޓީމުގެ ކުޅުމަށް ގެންނަން ގަސްތުކުރާ ބަދަލުތަކާ ގުޅޭގޮތުން ވާހަކަދައްކަމުން އުރުބާނީ ބުނީ، ”ދެން އޮތް މެޗަށް ފަހަތުން ކުޅޭ ކުޅުން ރަނގަޅުކުރަން އަހަރެން އިސްކަންދޭނަން. މީގެ 10 ނުވަތަ 15 އަހަރު ކުރިން އަހަރެން ރާއްޖޭގައި އަމަލުކުރި ގޮތަށް ޑިފެންޑަރުންގެ ބަދަލުގައި މިޑްފީލްޑަރުން ފަހަތަށް ލައިގެން ކުޅުމުގެ ވައްޓަފާޅިއަށް ބަދަލުކުރުމަކީ އެކަށީގެންވާ ކަމެއް،“ ކަމަށެވެ.
ކޯޗުގެ އުންމީދަކީ ކުޅުންތެރިންނަށް މި ބަދަލުތައް އަވަހަށް ދަސްވުމެވެ. ޓީމަށް ބަދަލުތަކެއް ގެނައި ނަމަވެސް، ފުރަތަމަ މެޗުގައި ކުޅުނު ކުޅުންތެރިން މުޅިން ބާކީ ނުކުރާނެ ކަމުގެ ޔަގީންކަން އޭނާ ދިނެވެ. ކޯޗު ގަބޫލުކުރާ ގޮތުގައި ހުރިހާ ކުޅުންތެރިންނަށް ވެސް ކުޅުމުގެ ފުރުސަތު ދިނުމަކީ މުހިންމު ކަމެކެވެ. އެކަށީގެންވާ ފުރުސަތު ނުލިބޭނަމަ، ބޯޅަ ހިފައިގެން ކުޅުމުގެ އިތުބާރު ކުޅުންތެރިންގެ ކިބައިގައި ނުހުންނާނެ ކަމަށް އޭނާ ފާހަގަކުރިއެވެ.
ބޫޓާނާ ބެހޭގޮތުން ވާހަކަދައްކަމުން އުރުބާނީ ބުނީ، ބޫޓާނަކީ ރީތި ފުޓުބޯޅައެއް ކުޅޭ ވަރުގަދަ ޓީމެއް ކަމަށެވެ. އެހެންނަމަވެސް، އެ ޓީމާ ދެކޮޅަށް ރަނގަޅު ނަތީޖާއެއް ނެރެވޭނެ ފެންވަރާއި ހުނަރު ދިވެހި ޓީމުގައި އެބަހުރި ކަމަށް އޭނާ ބުންޏެވެ.
މުބާރާތުގެ ގްރޫޕް ސްޓޭޖުގައި ރާއްޖެއަށް ބާކީ ދެން އޮތީ މިރޭ ބޫޓާނާ ދެކޮޅަށް ކުޅޭ މެޗާއި، އަންނަ ހުކުރު ދުވަހުގެ ހަވީރު ނޭޕާލާ ދެކޮޅަށް ކުޅޭ މެޗެވެ. އުރުބާނީ އުންމީދު ކުރަނީ ނޭޕާލް މެޗާ ހަމައަށް ދާއިރު، މޮޅެއް ހޯދައިގެން މުބާރާތުގެ ކުރިއަށް ދިއުމުގެ ފުރުސަތު ރާއްޖެއަށް އޮންނާނެ ކަމަށެވެ.
