ބޭންކް އޮފް މޯލްޑިވްސް (ބީއެމްއެލް) އިން އެ ކުންފުނީގެ ހިއްސާގެ އޮނިގަނޑަށް ގެންނަން ނިންމާފައިވާ ބަދަލުތަކާއެކު، ރާއްޖޭގެ ހިއްސާގެ ބާޒާރަށް ބޮޑު ކުރިއެރުމަކާއި ފުރިހަމަކަމެއް ލިބިގެންދާނެ ކަމަށް ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްއޭ) ގެ ސީއީއޯ މުހައްމަދު ހުސައިން މަނިކު ވިދާޅުވެއްޖެއެވެ.
ރޭ ޕްރޮގްރާމެއްގައި ވާހަކަދައްކަވަމުން މަނިކު ވިދާޅުވީ، ބީއެމްއެލްގެ ހިއްސާ 1:10 ރޭޝިއޯ އިން ބައިކުރުމުން ހިއްސާދާރުންގެ އަތުގައި ހުރި ހިއްސާގެ އަދަދު އިތުރުވެ، ހިއްސާއެއްގެ އަގު ބާޒާރުގައި ހެޔޮވާނެ ކަމަށެވެ. މީގެ ސަބަބުން ހިއްސާ ގަނެވިއްކުމުގެ މުއާމަލާތްތައް އިތުރުވެ، ހިއްސާގެ ބާޒާރަށް ފަހި ބަދަލުތަކެއް އަންނާނެ ކަމަށް އޭނާ ލަފާކުރެއްވިއެވެ.
”މިހާރު ހިއްސާގެ އަގުތައް ހުރީ ވަރަށް މަތީގައި ހިފެހެއްޓިފައި. އެހެންނަމަވެސް، ހިއްސާގެ އަގު ކުޑަވުމުން ބޭންކުގެ ’ގްރޯތު ޕޮޓެންޝަލް‘ ނުވަތަ ކުރިއެރުމުގެ ފުރުސަތު ބޮޑުވެގެންދާނެ،“ މަނިކު ވިދާޅުވިއެވެ. އޭނާ އިތުރަށް ވިދާޅުވީ، ސްޓޮކް އެކްސްޗޭންޖުގައި ލިސްޓްކޮށްފައިވާ އެހެން ކުންފުނިތަކުން ވެސް ބީއެމްއެލް ފަދައިން ހިއްސާއަށް ބަދަލު ގެނައުމަކީ ސީއެމްޑީއޭގެ ވަރަށް ބޮޑު އެދުމެއް ކަމަށާއި، އޭގެ ފައިދާ އާންމު ރައްޔިތުންނަށް ކުރާނެ ކަމަށެވެ.
މި ޕްރޮގްރާމްގައި މޯލްޑިވްސް ސްޓޮކް އެކްސްޗޭންޖްގެ މެނޭޖިންގ ޑިރެކްޓަރ އެންޑް ގްރޫޕް ސީއީއޯ މުހައްމަދު އައުޝަން ލަތީފް ވެސް ވަނީ ބައިވެރިވެވަޑައިގެންފައެވެ. އައުޝަން ވިދާޅުވީ ބީއެމްއެލްގެ ހިއްސާގެ މޫނުމަތީ އަގު ކުޑަވުމުން، ހިއްސާ އަކީ އާންމުންގެ އަތްފޯރާ ފަށުގައި ހުންނަ އެއްޗަކަށް ވެގެންދާނެ ކަމަށެވެ. މީގެ ކުރިން ހިއްސާގެ ބާޒާރުގައި ގަންނަން ބޭނުންވާ މީހުން ގިނަވެފައި ވިއްކާނެ މީހުން މަދު ނަމަވެސް، މި ބަދަލާއެކު ހިއްސާ ވިއްކާ ފަރާތްތައް އިތުރުވެ މާކެޓް ހަރަކާތްތެރިވާނެ ކަމަށް އޭނާ ވިދާޅުވިއެވެ.
އައުޝަން މިސާލެއްގެ ގޮތުން ވިދާޅުވީ، ކުރިން 100 ހިއްސާ އޮންނަ މީހަކު އޭނާއަށް ލިބޭ ޑިވިޑެންޑް ރަނގަޅުވުމުން ހިއްސާ ވިއްކާލަން ބޭނުންނުވެދާނެ ކަމަށެވެ. ނަމަވެސް މި ބަދަލާއެކު އެމީހެއްގެ އަތުގައި 3،000 ހިއްސާ ހުންނާނެތީ، އޭގެ ތެރެއިން ބައެއް ވިއްކާލުމުގެ ފުރުސަތު ބޮޑުވާނެ ކަމަށް އޭނާ ފާހަގަކުރެއްވިއެވެ.
ބީއެމްއެލް އިން ހިއްސާއަށް ގެންނަ މައިގަނޑު ބަދަލުތައް:
- ބޯނަސް ހިއްސާ ދޫކުރުން: 18 މާރިޗު 2026 އާ ހަމައަށް ހިއްސާ އޮންނަ ފަރާތްތަކަށް، ކޮންމެ 1 ހިއްސާއަކަށް އިތުރު 2 ބޯނަސް ހިއްސާ އެއްވެސް އަގަކާ ނުލައި ދިނުމަށް ބޯޑުން ވަނީ ހުށަހަޅާފައެވެ. މިއާއެކު 100 ހިއްސާ އޮތް ފަރާތަކަށް ޖުމްލަ 300 ހިއްސާ ލިބޭނެއެވެ.
- ހިއްސާ ބައިކުރުން : 1:10 ރޭޝިއޯ އިން ހިއްސާ ބައިކުރުމުން، ބޯނަސް ހިއްސާއާއެކު މިހާރު ހުރި ކޮންމެ ހިއްސާއެއް 10 ބަޔަށް ބައިކުރެވޭނެއެވެ.
މި ބަދަލުގެ ސަބަބުން މިހާރު 100 ހިއްސާ އޮންނަ މީހެއްގެ ޖުމްލަ ހިއްސާގެ އަދަދު 3،000 އަށް ބަދަލުވާނެއެވެ. އަދި ހިއްސާއެއްގެ މޫނުމަތީ އަގު 50 ރުފިޔާއިން 5 ރުފިޔާއަށް ކުޑަވި ނަމަވެސް، ހިއްސާދާރުގެ އަތުގައި ހުރި ހިއްސާގެ ޖުމްލަ އަގަށް ބަދަލެއް ނާންނާނެއެވެ.
ބީއެމްއެލް އިން މި ބަދަލުތައް ގެންނަނީ އިންވެސްޓަރުންނަށް ކުޑަ އަގެއްގައި ހިއްސާ ހޯދުމުގެ މަގުފަހިކޮށްދީ، ހިއްސާގެ ބާޒާރުގައި އާންމުންގެ ބައިވެރިވުން އިތުރުކޮށް، މާކެޓް ލިކުއިޑިޓީ ވަރުގަދަކުރުމުގެ މަގުސަދުގައެވެ.
