ސަރުކާރުން އަލަށް ތައާރަފުކުރި ”މާލޭ ޓެކްސީ ލައިން“ ގެ ޚިދުމަތް ފެށިތާ ދެ ހަފުތާގެ މުއްދަތަކަށް ފަހު، މިއަދުން ފެށިގެން ދަތުރުތަކަށް ފައިސާ ނަގަން ފަށައިފިއެވެ.
މި މަހުގެ ދެވަނަ ދުވަހު މި ޚިދުމަތް ރަސްމީކޮށް ފެށިއިރު، ސަރުކާރުން ފުރަތަމަ ނިންމާފައި އޮތީ ފުރަތަމަ ހަފުތާގައި ހިލޭ ދަތުރުތައް ކޮށްދިނުމަށެވެ. ނަމަވެސް އާންމުންގެ އެދުމުގެ މަތިން، އެ މުއްދަތު އިތުރު އެއް ހަފުތާއަށް އިތުރުކޮށް، ޖުމލަ ދެ ހަފުތާ ވަންދެން ވަނީ ހިލޭ ޚިދުމަތް ދީފައެވެ.
މި ޚިދުމަތް ދެމުންގެންދާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނި ގޮތުގައި، މިއަދުން ފެށިގެން ދަތުރުތަކަށް އަގު ނަގަމުންދާނީ އާންމުކޮށް ޓެކްސީތަކުން ވެސް ނަގަމުންދާ ރަސްމީ އަގުތަކުގައެވެ.
މާލޭގެ ޓެކްސީ ދަތިކަމަށް ހައްލެއް ހޯދައިދިނުމުގެ މަގުސަދުގައި ފެށި މި ޚިދުމަތަށް ބޮޑު ތަރުހީބެއް ލިބުނު ނަމަވެސް، ފާއިތުވި ދެ ހަފުތާގައި އާންމުންގެ ފަރާތުން ގިނަ ޝަކުވާތަކެއް ވަނީ ކުރިމަތިވެފައެވެ. އެގޮތުން ޓެކްސީއަށް އެދި ގުޅާ ހޮޓްލައިން ނަންބަރު 1655 އަށް ނުގުޅޭ ކަމަށާއި، ކޯލް ސެންޓަރުގެ ކިޔޫގައި ވިއްސަކަށް މިނެޓު މަޑުކުރަން ޖެހޭ ކަމުގެ ކަންބޮޑުވުން އާންމުން ފާޅުކޮށްފައިވެއެވެ. އަދި ކާރު އަންނަންދެން ގިނަ ވަގުތު އިންތިޒާރު ކުރަންޖެހޭ ކަމަށް ވެސް ބައެއް ރައްޔިތުން ބުނެފައިވެއެވެ.
މި ޝަކުވާތަކާ ގުޅިގެން އެމްޓީސީސީން ބުނީ، ޚިދުމަތް ހިލޭ ދެމުންދާތީ ގިނަ އަދަދެއްގެ ބަޔަކު އެއްފަހަރާ ގުޅަމުންދާތީ ބާރުބޮޑުވަނީ ކަމަށެވެ. އަދި ކޯލް ސެންޓަރުގެ އޭޖެންޓުން 24 ގަޑިއިރު މެދުނުކެނޑި މަސައްކަތް ކުރަމުންދާ ކަމަށް ވެސް އެ ކުންފުނިން ބުންޏެވެ.
މީގެ އިތުރުން، ޚިދުމަތް ފަސޭހަކުރުމަށް ތައާރަފުކުރި ވެބް އެޕްލިކޭޝަނާ މެދު ވެސް ވަނީ ސުވާލު އުފެދިފައެވެ. އެޕްލިކޭޝަންގައި ރަޖިސްޓްރީވާ މީހުންގެ އަމިއްލަ މައުލޫމާތު ލީކުވާ ކަމަށް ބުނެ ސޯޝަލް މީޑިއާގައި ފެތުރުނު ޚަބަރުތަކާ ގުޅިގެން، ތައާރަފުކުރިތާ މަދު ވަގުތުކޮޅެއްގެ ތެރޭގައި އެ އެޕްލިކޭޝަން ވަނީ ބޭނުންކުރުން ހުއްޓާލައިފައެވެ.
ޓެކްސީ ހޯދުމުގެ ދަތިކަމަށް، ޚާއްސަކޮށް ވާރޭވެހޭ ދުވަސްވަރު ދިމާވާ އުނދަގޫތަކަށް ހައްލެއް ހޯދުމަށް ފެށި މި މަޝްރޫއުގެ ދަށުން 150 ކާރު ވަނީ ރާއްޖެ ގެނެސްފައެވެ. މީގެ ތެރޭގައި މާލޭގެ ހަނި މަގުތަކަށް ޚާއްސަ ކުދި ކާރުތަކާއި، މާލެ އާއި ހުޅުމާލެއާ ދެމެދު ދަތުރުކުރާނެ ބޮޑެތި ކާރުތައް ވެސް ހިމެނެއެވެ.
ދަތުރުތަކަށް ފައިސާ ނަގަން ފެށުމުން، ޚިދުމަތަށް އޮތް ބާރު ކުޑަވެ، ޓެކްސީ ހޯދުމަށް އޮތް ތަކުލީފަށް ލުޔެއް ލިބޭނެ ކަމަށް ގިނަ ބަޔަކު އުންމީދު ކުރެއެވެ.
