ދިވެހީންނާ ކައިވެނިކޮށްގެން އުޅޭ ބޭރު ގައުމުތަކުގެ މީހުންނަށް ދައުލަތުން ދޫކުރާ ސިއްހީ އިންޝޫރަންސް، އާސަންދައިގެ ޚިދުމަތް ނުލިބޭތީ އެކަމުގައި ރައްޔިތުންގެ މަޖިލީހުގެ މެންބަރުންގެ ޚިޔާލު ހޯދުމަށް ގަރާރެއް މިއަދު މަޖިލީހަށް ހުށަހަޅައިފިއެވެ.
މި ގަރާރު ހުށަހެޅުއްވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ.
ކުޑޫ ހުށަހެޅުއްވި ގަރާރުގައި ފާހަގަކުރައްވާފައިވަނީ، ގާނޫނުއަސާސީއަށް ބަލާއިރު އިންތިޚާބުތަކުގައި ވާދަކުރުމާއި އިންތިޚާބުގައި ވޯޓުލުމުގެ ހައްގު ފިޔަވައި ދިވެހީންނާ އެހެން މީހުންނާ ދެމެދު އެއްވެސް ހައްގެއް ލިބިދިނުމުގައި ތަފާތުކުރުމެއް ނެތްކަމެވެ.
ގަރާރުގައި ބުނެފައިވަނީ، ދިވެހީންގެ ތެރެއިން ގިނަ އަދަދެއްގެ މީހުން މިހާރުވެސް ބިދޭސީންނާ ކައިވެނިކޮށްގެން ދިރިއުޅެމުން އަންނަކަމަށާއި، އެ ކައިވެނިތަކަށް ދަރިން ލިބި، އެ ދަރިން ބޮޑެތިވެފައިވާކަން ވެސް ފާހަގަކުރައްވާފައިވާ ކަމަށެވެ. ނަމަވެސް، އާސަންދަ ލިބެނީ ހަމައެކަނި ދިވެހީންނަށް ކަމަށްވުމުން، މިފަދަ އާއިލާތަކަށް ބޮޑެތި ދަތިތަކާ ކުރިމަތިލާން ޖެހިފައިވާ ކަމަށް ގަރާރުގައިވެއެވެ.
މެންބަރު ކުޑޫގެ ގަރާރުގައި އިތުރަށް ބުނެފައިވަނީ، ގާނޫނުއަސާސީގައިވާ ގޮތުން ދިވެހި ރައްޔިތުން ކަމަށް މާނަކުރަނީ ގާނޫނުއަސާސީއަށް އަމަލުކުރަން ފަށާއިރު ދިވެހި ރައްޔިތެއްކަމުގައިވާ ކޮންމެ މީހަކާއި ދިވެހި ރައްޔިތަކަށް އުފަން ކޮންމެ ދަރިއަކާއި ގާނޫނުގައިވާ ގޮތުގެ މަތިން ދިވެހި ރައްޔިތަކަށް ވެއްޖެ ކޮންމެ ބިދޭސިއެއް ކަމަށެވެ. އެހެންނަމަވެސް، ބިދޭސީންނަށް ދިވެހި ރައްޔިތުކަން ލިބެން އޮތް ހަމައެކަނި ގޮތަކީ ދިވެހިރާއްޖޭގެ ސިޓިޒެންޝިޕް ގާނޫނުގައި ބަޔާންކޮށްފައިވާ އުސޫލުން ދިވެހި ރައްޔިތަކަށްވުން ކަމަށާއި، އެ ގާނޫނަށް ބައި ގަރުނަށް ވުރެ ގިނަ ދުވަސްވެފައިވާތީ ދިވެހީންނާ ކައިވެނިކޮށްގެން އުޅޭ ބިދޭސީންނަށް އެ ފުރުސަތު ހޯދައިދެވިފައިނުވާ ކަމަށް ވެސް ގަރާރުގައި ބަޔާންކުރައްވާފައިވެއެވެ.
ގަރާރުގައި ފާހަގަކުރައްވާފައިވާ ގޮތުގައި، ދިވެހީންނާ ކައިވެނިކޮށްގެން އުޅޭ ބިދޭސީންގެ ތެރެއިން ބައެއް މީހުން މިހާރު މުސްކުޅިވެ، ލޯބޯ ކޮށިވެ، ދާއިމީ ބަލިތަކާއި ބޮޑެތި ބަލިތަކަށް ބޭސްކުރަން ޖެހިފައިވުމުގެ ސަބަބުން ސިއްހީ ޚަރަދުތައް ހޯދަން ދަތިވެފައިވެއެވެ. އަދި މިފަދަ ބައެއް ބިދޭސީންނަކީ ރާއްޖޭގައި އެތައް އަހަރެއް ހޭދަކޮށް ވަޒީފާ އަދާކޮށް، އާމްދަނީ ހޯދުމަށް މަސައްކަތްކޮށްފައިވާ ބަޔަކަށް ވުމުން، އެ މީހުންނަށް އަޅާލައި ދައުލަތުގެ ރައްކާތެރިކަމާއި ގާނޫނުން ލިބިދޭ މަންފާތައް ހަމަހަމަކަމާ އެކު ލިބުމަކީ އެ މީހުންގެ ވެސް ހައްގެއް ކަމަށް ގަރާރުގައި ބުނެފައިވެއެވެ.
އެހެންކަމުން، ގާނޫނުއަސާސީގައިވާ ގޮތުން މުޖުތަމައުގެ އާންމު ހާލަތަށްވުރެ ނިކަމެތިކަމެއް ލިބިފައިވާ މީހަކަށް ނުވަތަ ބަޔަކަށް ދައުލަތުން ޚާއްސަ ކަންތައްތަކެއް ކޮށްދެވިދާނެކަން އެނގެން އޮތް ކަމަށް ވެސް މެންބަރު ކުޑޫގެ ގަރާރުގައި ބަޔާންކޮށްފައިވެއެވެ.
މި ގަރާރާ މެދު މަޖިލީހުން އަމަލުކުރާނެ ގޮތެއް އަދި ބަޔާނެއް ނުކުރެއެވެ.
ކުޑޫ ކަލޯ މީހާގެ ބުއްދި ގޯސްވެފަ ތިހުރީ އިސްތިއުފާ ދީފަ ގުރާދޫ އަށް ދޭ