ޤައުމީ ދުވަހަކީ މާޔޫސްކަމާ ދުރަށް ގޮސް، އުންމީދުން ފުރިގެންވާ ދުވަހެއް ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.
ވަޒީރު މިހެން ވިދާޅުވީ، ރައީސް އިޢުލާންކުރައްވާފައިވާ ޤައުމިއްޔަތު އިޢާދަކުރުމުގެ މަޝްރޫޢުގެ ބޭނުމަކީ ޢިއްޒަތްތެރި، ޝުހުރަތްތެރި ދައުލަތެއްގެ ގޮތުގައި ދިވެހިރާއްޖެ ބޭރު ދުނިޔެއަށް ސާބިތުކޮށްދިނުންކަމަށް ވާތީއެވެ. މިކަންކަން ވަޒީރު ފާހަގަކުރެއްވީ، ދުވަހުގެ ބަޠަލު މުޙައްމަދު ތަކުރުފާނު ނިސްބަތްވެވަޑައިގަންނަވާ ހއ. އުތީމުގައި ބޭއްވި މިއަހަރުގެ ޤައުމީ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުންނެވެ.
ޤައުމީ ދުވަހުގެ މުހިންމުކަމުގެ މައްޗަށް އަލިއަޅުވާލައްވަމުން ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހިމް ވިދާޅުވީ، މި ދުވަހަކީ ދިވެހިންގެ ސަލާމަތާއި ރައްކާތެރިކަމާ ގުޅިފައިވާ ދުވަހަކަށް ވީތީ، ދިވެހިންނަށް ވަރަށް މުހިންމު ދުވަހެއް ކަމުގައެވެ. އެގޮތުން، 1558 ވަނަ އަހަރު ޕޯޗުގީޒުންގެ އަޅުވެތިކަމަށް ރާއްޖެ ދިޔުމަށްފަހު، އެ ބައިމީހުންގެ ކިބައިން މުޙައްމަދު ތަކުރުފާނުގެ ލަޝްކަރުން ރާއްޖެ ސަލާމަތްކުރެއްވި ދުވަހަކީ ޤައުމީ ދުވަސްކަން ވަޒީރު ފާހަގަކުރެއްވިއެވެ. އަދި މި ދުވަހުން ޙާސިލުކުރަންޖެހޭ ބައެއް ޢިބުރަތްތައްވެސް ވަޒީރުގެ ވާހަކަފުޅުގައި ހިމެނުނެވެ.
”ޤައުމީ ދުވަސް ބުނެދެނީ އުންމީދުގެ ދުވަސްކަން. އެއީ މާޔޫސްކަމާ ދުރަށް ދާންވި ދުވަސްކަން. ޤައުމީ ދުވަހަކީ ޤައުމީ އެއްބައިވަންތަކަމުގެވެސް ދުވަހެއްވެސްމެ. ކަޅުއޮށްފުންމި ބަނުމުގައި 40 މާވަޑިން ތަފާތު ކަންކޮޅުތަކުން ބައިވެރިވި. ޖިހާދު ކުރިއަށްދިޔައިރު، އެކި ރަށްރަށުން އުތީމު މަހާރަދުންނަށް ދެއްވި އެހީތެރިކަން ފާހަގަކޮށްލަންޖެހޭ.“ ވަޒީރު ވިދާޅުވިއެވެ.
ރައީސުލްޖުމްހޫރިއްޔާ އިޢުލާންކުރައްވާފައިވާ ޤައުމިއްޔަތު އިޢާދަކުރުމުގެ މަޝްރޫޢަށް އަލިއަޅުވާލައްވަމުން ވަޒީރު އާދަމް ނަޞީރު ވިދާޅުވީ، މި މަޝްރޫޢަކީ ދިވެހިންގެ ސިފަތައް އަލުން އަށަގެންނެވުމުގެ މަޝްރޫޢެއް ކަމަށެވެ. އެ ގޮތުން، ދިވެހިންގެ އަމިއްލަވަންތަކަމާއި ޤައުމިއްޔަތާއި ބަހާއި ސަގާފަތް އަލުން އިޢާދަކުރެވޭނެކަމަށް ވަޒީރު ވިދާޅުވިއެވެ. އަދި މި މަޝްރޫޢުގެ ސަބަބުން މިނިވަންކަމާއެކު ދެމިތިބުމުގެ ފިކުރެއް އުފެއްދި، އެހެން ޤައުމުތަކެކޭވެސް އެއްގޮތަށް މިނިވަންކަމާއި ޢިއްޒަތާއި ޝުހުރަތު ޙައްޤު އަދި އެކަން ޤާއިމުކުރާ ބައެއްކަން ސާބިތުކޮށްދެވޭނެކަމަށް ވަޒީރު ފާހަގަކުރެއްވިއެވެ.
މިއަހަރުގެ ޤައުމީ ދުވަހުގެ ރަސްމީ ޖަލްސާ ބާއްވާފައިވަނީ، ދުވަހުގެ ބަޠަލު މުޙައްމަދު ތަކުރުފާނު ނިސްބަތްވެވަޑައިގަންނަވާ ހއ. އުތީމުގައެވެ. މި ޖަލްސާގައި ޝަރަފުވެރިކަމުގެ ޤައުމީ އިނާމާއި ހިތްވަރު ދިނުމުގެ އިނާމު ޙައްޤު ފަރާތްތަކަށް ވަނީ ދީފައެވެ.
