ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ޕީޕަލް ނޭޝަނަލް ކޮންގްރެސް (ޕީއެންސީ) ގެ ޓިކެޓުގައި ވާދަކުރައްވާ ކެންޑިޑޭޓުންނަށް ތާއީދު ހޯދުމުގެ ގޮތުން ކުރިއަށްގެންދާ ”ދޮރުންދޮރަށް“ ޙަރަކާތް މިއަދު ރަސްމީކޮށް ފަށައިފިއެވެ.
މި ޙަރަކާތް ރަސްމީކޮށް ފަށާފައިވަނީ މިއަދު ހެނދުނު 09:00 ގައި ޕީއެންސީގެ މައި ޖަގަހައިގައި ބޭއްވި ޚާއްޞަ ރަސްމިއްޔާތެއްގައެވެ. މި ރަސްމިއްޔާތާއި ޙަރަކާތުގައި މާލެ ސިޓީގެ މޭޔަރު ކަމަށް ޕީއެންސީގެ ޓިކެޓުގައި ވާދަކުރައްވާ މޫސާ ޢަލީ ޖަލީލާއި، މާލެ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާ ކަމަށް ވާދަކުރައްވާ ޢާއިޝަތު އަލައިކާ އަދުނާންގެ އިތުރުން މާލެ ސިޓީ ކައުންސިލަށް އެ ޕާޓީގެ ފަރާތުން ވާދަކުރައްވާ ހުރިހާ ކެންޑިޑޭޓުން ބައިވެރިވެވަޑައިގެންނެވިއެވެ.
މާލެއާއި ހުޅުމާލޭގެ ހުރިހާ އަވަށްތަކަކަށް އަމާޒުކޮށްގެން ކުރިއަށްގެންދާ މި ކެމްޕެއިން ޙަރަކާތުގެ މައިގަނޑު މަޤްޞަދަކީ ރައްޔިތުންނާ ގާތުން ބައްދަލުކޮށް، ރައްޔިތުންގެ ހުރި ކަންބޮޑުވުންތައް އަޑުއެހުމާއި ކެންޑިޑޭޓުންގެ ސިޔާސަތުތައް ހިއްސާކުރުމެވެ.
މި ޙަރަކާތް ފެށުމުގެ ރަސްމިއްޔާތުގައި ވާހަކަދައްކަވަމުން ޕީއެންސީގެ ކެމްޕެއިން މެނޭޖަރ އަދި ޕާލަމެންޓްރީ ގްރޫޕްގެ ލީޑަރ އިބްރާހިމް ފަލާހު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގަންނަވަނީ ރައްޔިތުންނާ ގާތުން މަސައްކަތްކުރުމަށް ކަމަށެވެ. އަދި މި ޙަރަކާތުގެ ސަބަބުން ރައްޔިތުންނަށް ކުރިމަތިވެފައިވާ ދަތިތައް ސަރުކާރާ ހަމައަށް ގެނެސްދިނުމަށް މަގުފަހިވާނެ ކަމަށް އޭނާ ފާހަގަކުރެއްވިއެވެ.
ފަލާހު އިތުރަށް ވިދާޅުވީ، މޭޔަރު ކަމަށް ވާދަކުރައްވާ މޫސާ ޢަލީ ޖަލީލަކީ ރައީސް މުޢިއްޒު ގެންގުޅުއްވާ ތަރައްޤީގެ ތަޞައްވުރާ އެއްގޮތަށް، އިޚްލާޞްތެރިކަމާ އަމާނާތްތެރިކަމާއެކު މަސައްކަތް ކުރައްވާނެ ބޭފުޅެއް ކަމަށެވެ. މީގެއިތުރުން، ރާއްޖޭގެ ހުރިހާ ރަށެއްގައި ތިއްބެވި ޕީއެންސީގެ ކެންޑިޑޭޓުންވެސް މިފަދަ ”ދޮރުންދޮރަށް“ ޙަރަކާތްތައް ފެށުމަށް ފަލާހު ވަނީ އިލްތިމާސް ކުރައްވާފައެވެ.
2026 ވަނަ އަހަރުގެ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބުގައި، ކައުންސިލްތަކަށް 681 މެންބަރުން އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް 681 މެންބަރުން އިންތިޚާބު ކުރުމަށް ވަނީ ހަމަޖެހިފައެވެ.
