އަންނަ އެޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ އިންތިޚާބުތަކަށް 8 ލައްކައަށްވުރެ ގިނަ ވޯޓު ކަރުދާސް ޗާޕްކުރާނެ ކަމަށް އިލެކްޝަންސް ކޮމިޝަނުން (އީސީ) ހާމަކޮށްފިއެވެ. މިއީ ރާއްޖޭގެ އިންތިޚާބެއްގައި މިހާ ގިނަ އަދަދަކަށް ވޯޓު ކަރުދާސް ޗާޕްކުރާ ފުރަތަމަ ފަހަރެވެ.
އިލެކްޝަންސް ކޮމިޝަނުން ވިދާޅުވި ގޮތުގައި، މިފަހަރު ބާއްވާ ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުން ރައްޔިތުންގެ ޚިޔާލު ހޯދުމުގެ އާންމު ވޯޓުގައި ޖުމްލަ 294،876 މީހުންނަށް ވޯޓުލުމުގެ ޙައްޤު ލިބިގެންވެއެވެ. މި އިންތިޚާބުގައި ކޮންމެ ވޯޓުލާ މީހަކަށްވެސް ތިން ކަމަކަށް ވޯޓުލުމަށް 3 ކަރުދާސް ލިބޭނެއެވެ.
އިދާރީ ތައްޔާރީތަކާ ގުޅޭގޮތުން ޕީއެސްއެމް ނިއުސްގެ ”ރާއްޖެ މިއަދު“ ޕްރޮގްރާމުގައި ވާހަކަ ދައްކަވަމުން، އިލެކްޝަންސް ކޮމިޝަންގެ ޑިރެކްޓަރ ޝަހުލާ އިސްމާޢިލް ވިދާޅުވީ ވޯޓު ކަރުދާސް ޗާޕްކުރުމުގެ މަސައްކަތުގެ %85 އާއި %95 އާ ދެމެދު މިހާރު ނިމިފައިވާ ކަމަށެވެ.
”ދިވެހިރާއްޖޭގެ އިންތިޚާބަކަށް އެންމެ ގިނަ ވޯޓު ކަރުދާސް ޗާޕް ކުރާ ފަހަރަށްވާނެ މިފަހަރު. އަޅުގަނޑުމެން 800,000 އަށް ވުރެ ގިނަ ވޯޓު ކަރުދާސް ޗާޕް ކުރުމުގެ މަސައްކަތް ކުރިއަށްދާއިރު %85 އާއި %95 ދެމެދު މަސައްކަތް ނިންމާލެވިފައިވާކަން ފާހަގަކުރަން،“ ޝަހުލާ ވިދާޅުވިއެވެ.
މި އިންތިޚާބުގައި ވޯޓުލުމަށްޓަކައި ޖުމްލަ 588 މަރުކަޒެއްގައި ވޯޓުފޮށި ބެހެއްޓުމަށް ވަނީ ހަމަޖެހިފައެވެ. އެއީ:
- މާލޭގައި: 180 ފޮށި
- ހުޅުމާލޭގައި: 51 ފޮށި
- ވިލިމާލޭގައި: 9 ފޮށި
- އަތޮޅުތަކުގައި: 322 ފޮށި
- ރިސޯޓުތަކުގައި: 21 ފޮށި
- ޖަލުތަކުގައި: 5 ފޮށި
އިލެކްޝަންސް ކޮމިޝަނުން ބުނީ ކޮންމެ ވޯޓުލާ ސްޓޭޝަނެއްގައިވެސް ތިން ވޯޓަށް ވަކިވަކި ތިން ފޮށި ހުންނާނެ ކަމަށެވެ. އަދި ވޯޓު ކަރުދާސްތައް މަރުކަޒުތަކަށް ފޮނުވާނީ ކޮމިޝަނުން ބަލަންޖެހޭ ކަންކަން ބެލުމަށްފަހު، ސެކިއުރިޓީ އުރަތަކުގައި ބަންދުކޮށް، ސެކިއުރިޓީ ފޮށިތަކުގައެވެ. މި ފޮށިތައް ކަނޑާނީ ވޯޓުލާ ދުވަހު އޮބްޒާވަރުންނާއި، މޮނިޓަރުން އަދި ވޯޓުލާން ގޮސްތިބޭ މީހުންގެ ކުރިމަތީގައެވެ.
ކޮމިޝަނުން ވަނީ ކޮންމެ މީހަކުވެސް ވޯޓުލާއިރު ރަނގަޅު ފޮއްޓަށް ކަރުދާސްކޮޅު ލުމަށް ސަމާލުވުމަށް އެދިފައެވެ. އަދި އިންތިޚާބަކީ ޑިމޮކްރަސީގެ މުހިންމު ބަހާއަކަށްވާތީ، ޤާނޫނުން ލިބިދޭ ވޯޓުލުމުގެ ޙައްޤު އެންމެހާ ރައްޔިތުންވެސް ފުރިހަމައަށް އަދާކުރުމަށް އެ ކޮމިޝަނުން ވަނީ އިލްތިމާސްކޮށްފައެވެ.
